Бугунги кунда республикада 2 148 та масжид фаолият юритмоқда. Бу ҳақда Ҳукумат ҳузуридаги Дин ишлари бўйича қўмита матбуот котиби Илҳом Маъруповнинг 2025 йилда диний-маърифий соҳада амалга оширилган ишлар юзасидан брифингида маълум қилинди.

Ҳисобот даврида 3 та янги масжид рўйхатдан ўтказилган ва 43 та масжидда тубдан қайта қуриш ҳамда 15 та масжидда таъмирлаш ишлари якунланган.

2025-йилги Ҳаж мавсуми ва Умра зиёрати юқори савияда ташкил этилди. Хусусан, 15 000 нафар зиёратчи Ҳаж амалини бажарди.

Айни пайтда республикада 199 та ноисломий диний ташкилот фаолият юритмоқда. 2025 йилда Навоий вилоятида 1 та янги диний ташкилот – Рим-католик черкови давлат рўйхатидан ўтказилди.

Мутаассиблик, радикал ғоялар ва экстремизм руҳидаги ахборотларга қарши 3411 та раддия мазмунидаги материаллар тайёрланиб, тарқатилди.

Барча диний таълим муассасаларининг ўқув-услубий, маънавий-маърифий, илмий йўналишлари тубдан қайта кўриб чиқилди. Ўқув дастурлари такомиллаштирилиб,  10 га яқин янги фанлар киритилди. Мутахассислик фанлари бўйича янги авлод дарсликлари тайёрланди.

Қўмита ҳузуридаги Малака ошириш институти ва унинг филиалларида 1 729 нафар давлат ва жамоат ташкилотлари раҳбар-ходимларининг малакаси оширилди.

Ҳисобот даврида Дин ишлари бўйича қўмита ҳамда тизим ташкилотлари вакиллари, ўзбекистонлик исломшунос олимлар ва тадқиқотчиларнинг 439 та диний-маърифий соҳага оид халқаро тадбирлардаги иштироки таъминланди.

• Din ishlari bo‘yicha qo‘mita
• Масжид
• статистика