Россия Фан ва олий таълим вазирлигининг расмий сайтида эълон қилинган “Россия ва Ўзбекистон ўртасидаги ҳамкорлик: Россия университетларининг янги филиаллари, Суффа халқаро радиоастрономия обсерваторияси, қўшма илмий лойиҳалар” номли мақолада келтирилишича, яқин йилларда Ўзбекистонда Россиянинг 7 та университети ўз филиалларини очишни режалаштирган.
“Бугунги кунда Россия ва Ўзбекистон ҳамкорликда кўплаб лойиҳаларни амалга оширмоқда. Энг йирикларидан бири – кенг кўламли астрофизик тадқиқотларни ўтказиш учун мўлжалланган Суффа халқаро радиокосмик обсерваториясини қурилиши доирасида амалга ошириляпти. Бундан ташқари, ўзбекистонлик 48,7 минг талаба Россия ОТМларида таълим олмоқда. Яқин йилларда Россиянинг яна 7 та университети Ўзбекистонда ўз филиалларини очишни режалаштирган”, –дейилади мақолада.
Қайд этилишича, Россиянинг қуйидаги 7 та университети – Н.И.Пирогов номидаги Россия миллий тадқиқот тиббиёти университети, А.Н.Косигин номидаги Россия давлат университети (Технология. Дизайн. Санъат), Шимолий Кавказ федерал университети, Самарқандда Россия давлат гуманитар университети, Москва давлат геодезия ва картография университети, Перм миллий тадқиқот политехника университети, Москва давлат озиқ-овқат ишлаб чиқариш университетлари Ўзбекистонда ўз филиалини очишни режалаштирган.
Маълумот учун, бир муддат олдин Россия университетларининг дипломлари дунё томонидан тан олинмаслиги ҳақида хабарлар тарқалди. Унга кўра, Жаҳон ассоциациялари Россия университетлари томонидан берилган таълим дипломларини тан олишдан бош тортмоқда.
Ҳозирча, AACSB (Университетлар бизнес мактабларини ривожлантириш ассоциацияси), Business Graduates Association (Бизнес мактаблар битирувчилари ассоциацияси), AMBA (MBA дастурлари ассоциацияси), EFMD (Менежментни ривожлантириш билан шуғулланувчи бизнес мактаблар, компания ва ассоциациялар глобал тармоғи) Россия Федерациясининг барча муассасаларида аккредитацияни ўчиришга қарор қилган.
“Бизнес таълими бўйича жаҳон етакчилари сифатида бизнинг ташкилотларимиз тинчлик, хавфсизлик, эркинлик, хилма-хиллик ва ижтимоий масъулият қадриятларига содиқлигимиз туфайли 150 дан ортиқ мамлакат ва ҳудудлардаги ўқитувчилар ва раҳбарларни қўллаб-қувватлайди ва уларга хизмат қилади.
Биз Россиянинг Украинага бостириб кириши натижасида тез суръатлар билан ўсиб бораётган гуманитар инқироздан қаттиқ хавотирдамиз ва биз Украинадаги бизнес мактабларимиз ва уларнинг ходимлари, профессор-ўқитувчилари ва талабаларини ҳаёт тарзи ва суверенитетини ҳимоя қилишга ҳамда қўллаб-қувватлашга қарор қилдик”, – дейилади Университетлар бизнес мактабларини ривожлантириш ассоциацияси расмий сайтида.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!