2022 йилнинг 1 октябрь ҳолатига кўра Давлат қарзи қолдиғи 26,2 млрд. АҚШ долларни (шундан, давлат ташқи қарзи – 23,16 млрд. АҚШ долл., давлат ички қарзи – 3,07 млрд. АҚШ долл.) ёки ялпи ички маҳсулотга (ЯИМ) нисбатан 34,1 фоизни ташкил этди. Бу ҳақда Молия вазирлиги ҳисоботида қайд этилган.

Хусусан, давлат қарзининг ЯИМга нисбати 2021 йил бошида 39,0 фоиздан (2021 йил якунида – 38,0 фоиз) 2022 йилнинг 1 октябрь ҳолатига 34,1 фоизгача пасайди.

Халқаро валюта жамғармасининг мамлакатлар иқтисодиётига бағишланган ҳисоботига кўра, Ўзбекистон Республикасининг давлат қарзи бугунги кунда “мўътадил” даражада ҳисобланади.

Таъкидланишича, Давлат қарзини макроиқтисодий барқарор даражада сақлаш ва уни самарали бошқариш юзасидан амалга оширилаётган чоралар, шунингдек, миллий валюта алмашув курсининг барқарорлиги шароитида республика иқтисодиётининг юқори суръатлар билан ўсиши таъминлангани натижасида 2021 йилдан бошлаб давлат қарзининг ЯИМга нисбати барқарорлашиши кузатилган.

Бундан ташқари, 2022 йилнинг III чорагида ЯИМ реал ўсиш суръати 5,8 фоизни ташкил этган.

• Молия
• Ташқи қарз