“Ўзбеккосмос” агентлиги Республиканинг 8 та вилоятида жами 926 минг 799,5 гектар майдонда эҳтимоли юқори бўлган буғдой экилган ер майдонларини космик суратларни қайта ишлаш орқали аниқлаган.

Жорий йилнинг май-июнь ойлари давомида ғалла-йиғим мавсуми бошланганини инобатга олсак, ғалла ўриб олинган майдонларда айрим фуқаролар томонидан сомон поялари ҳамда унинг қолдиқларини ёқиб юбориш каби ноқонуний хатти-ҳаракатлар содир этилганини кузатиш мумкин.

Хусусан, “Ўзбеккосмос” агентлиги давлат космик мониторинги доирасида жорий йилнинг 9 июль санасига қадар Республикадаги жами 23 минг 273 гектарлик бошоқли дон экинларидан бўшаган ер майдонларида, сомон поялари ва уларнинг қолдиқлари ёниши билан боғлиқ 1 минг 960 та ҳолатни аниқлаган.

Бу ҳудудлар кесимида қуйидагича тақсимланмоқда. Хусусан, Тошкент вилоятида 9 минг 638 гектар (439 та ҳолат), Сурхондарё вилоятида 5 минг 7 гектар (562 та ҳолат), Самарқанд вилоятида 1 минг 711 гектар (191 та ҳолат), Наманган вилоятида 2 минг 9 гектар (112 та ҳолат), Жиззах вилояти 931 гектар (54 та ҳолат), Фарғона вилоятида 65 гектар (11 та ҳолат), Андижон вилоятида 3 минг 868 гектар (319 та ҳолат).

Эслатиб ўтамиз, 1 гектар ер майдонида бошоқли дон пояси ёқилганида, атмосфера ҳавосига 500 грамм азот оксиди, 379 грамм углеводород, 3 кг кул, 20 кг ис гази ва углерод оксиди (СО) гази тарқалади. Бу эса инсон организмида сил ва саратон касалликлари келиб чиқиши, атроф-муҳит ифлосланиб, тупроқ унумдорлиги пасайиши каби оқибатларга олиб келади.