Ҳукумат қарорига кўра, давлат олий таълим ташкилотларининг бакалавриат таълим йўналишларига ўқишга кириб, муайян ўқув йили бўйича GPA кўрсаткичи 4 ва ундан юқори бўлган, ижтимоий тоифадаги талабаларга навбатдаги ўқув йили учун қўшимча давлат гранти тақдим этилади.

Бунда талабгорлар ўз аризалари билан ҳар йили 20 июлга қадар олий таълим ташкилотининг расмий веб-сайти орқали рўйхатдан ўтади.

Рўйхатдан ўтган талабгорларнинг аризалари ҳар йили 25 июлга қадар:

Академик ўзлаштириш кўрсаткичини аниқлаш бўйича комиссия томонидан GPA кўрсаткичи 4 ва ундан юқори эканлиги;

Ижтимоий фаолликни аниқлаш бўйича комиссия томонидан ҳақиқатда талабгорнинг белгиланган тоифадаги талаба эканлиги кўриб чиқилиб, баҳоланади.

Қўшимча давлат гранти тақдим этилган талабалар ҳар йили 5 сентябрга қадар олий таълим ташкилоти томонидан хабардор қилинади.

Бундай қўшимча давлат гранти бериладиган тоифалар рўйхати Ижтимоий ҳимоя миллий агентлиги ҳамда Олий таълим , фан ва инновациялар вазирлиги томонидан тасдиқланади.

Молиявий мустақиллик берилган олий таълим ташкилотида GPA кўрсаткичи 3,3 дан 4 гача бўлган белгиланган тоифадаги талабаларга навбатдаги ўқув йили учун олий таълим ташкилоти гранти тақдим этилади.

Бунда молиявий мустақиллик берилган олий таълим ташкилотлари ҳар йили ўзларининг бюджетдан ташқари маблағлари ҳисобидан 1 млрд сўмгача бўлган миқдорда олий таълим ташкилоти грантини тақдим этади.

Бунда олий таълим ташкилоти гранти тақдим этилган талабанинг GPA кўрсаткичи: 

3.3- 3,39 бўлганда – тўлов-контракт суммасининг 20 фоизи;

3.4- 3,49 бўлганда – тўлов-контракт суммасининг 30 фоизи;

3.5- 3,59 бўлганда – тўлов-контракт суммасининг 40 фоизи;

3.6- 3,69 бўлганда – тўлов-контракт суммасининг 50 фоизи;

3.7- 3,79 бўлганда — тўлов-контракт суммасининг 60 фоизи;

3.8- 3,89 бўлганда – тўлов-контракт суммасининг 70 фоизи;

3.9- 3,99 бўлганда – тўлов-контракт суммасининг 80 фоизи миқдоридаги қисми ушбу олий таълим ташкилотининг бюджетдан ташқари маблағлари ҳисобидан қоплаб берилади.

Бунда талабгорлар ўз аризалари билан ҳар йили 20 июлга қадар олий таълим ташкилотининг расмий веб-сайти орқали рўйхатдан ўтади. Натижалар ҳар йили 5 сентябрга қадар эълон қилинади.

Маълумот учун, бундай қўшимча грант бериладиган тоифалар рўйхати Ижтимоий ҳимоя миллий агентлиги ҳамда Олий таълим, фан ва инновациялар вазирлиги томонидан тасдиқланади.

• Ижтимоий ҳимоя
• Олий таълим
• Oliy ta'lim, fan va innovatsiyalar vazirligi
• Талабалар