Франция пойтахти Париж шаҳрида давом этаётган ёзги Олимпия ўйинларининг ортда қолган тўққизинчи кунги мусобақалари сарҳисобига кўра, медаллар жамғариш бўйича Хитой ва АҚШ пойгасида океанорти мамлакати вакиллари чин юрти спортчиларидан ўзиб кетди.

Кеча, 4 август куни 13 та спорт турида қизиқарли ва йодда қоладиган баҳслар ўтказилди.

Жумладан, 37 ёшли сербиялик теннисчи Новак Жокович Испания вакили Карлос Алкарасни 7:6 (7:3), 7:6 (7:2) кўринишида доғда қолдириб, олтин медалга эга чиқди.

Шунингдек, украиналик Ярослава Магучих енгил атлетика спорт турининг баландликка сакраш дастурида олтин медалга сазовор бўлди.

Маълумотларга кўра, Сена дарёси сувининг пастлаб кетиши оқибатида Олимпия ўйинлари дастуридаги триатлон мусобақаларининг аралаш жамоавий баҳслари бекор қилинган.

Ўзбекистонлик спортчилар ичида Ҳасанбой Дўсматов ва Лазизбек Муллажоновлар рақибларини мағлуб этиб, финалга йўл олди.

Енгил атлетикачилар Анвар Анваров ва Сафина Саъдуллаева, велоспортчи Олга Забелинскаялар эса Олимпиададаги ўз иштирокларини медалларсиз якунлайдиган бўлди.

Париж-2024 ўйинларининг ўнинчи кунги мусобақалари остонасида АҚШ вакиллари 19 та олтин, 26 та кумуш, 26 та бронза, жами 71 та медаль билан етакчиликка эришиб олган бўлса, Хитой вакиллари 19 та олтин, 15 та кумуш, 11 та бронза, жами 45 та медаль билан иккинчи ўринда бормоқда. Умумжамоада 3-ўринни банд этган Франция олимпиячилари ҳисобида 12 та олтин, 14 та кумуш ва 18 та бронза медали мавжуд.

Эслатиб ўтамиз, бугунгача Олимпия ўйинларининг совринли ўринларига эга бўлган мамлакатлар сони 71 тага етди.

• АҚШ
• Бокс
• Ҳасанбой Дўсматов
• Новак Жокович
• Олимпиада
• Теннис
• Хитой