31°
Кечаси 18°
Дунёнинг у томонида жонсиз танаси тошлар остида ётган бегуноҳ боланинг қўллари, дунёнинг бу томонида эса ҳар куни қўлида китоблари ила мактабга бориб қайтадиган жиянларим… Ғазо болалар қабристонига айланиб бораётгани юраги бор инсонни ларзага солиши, шубҳасиз. Жанг қилаётган катталар-у жон бераётган болалар…
Исроил ва ХАМАС ўртасидаги уруш жорий йилнинг 7 октябрь куни Исроил ҳудудига юзлаб ракеталар отилгани билан бошланди. Исроил ҳукумати бунга жавобан ХАМАСга қарши уруш эълон қилди ва Ғазо секторини кенг кўламли ўққа тута бошлади.
“Ғазо – болалар қабристони!”
2 ноябрь ҳолатига кўра, Ғазода Исроил зарбалари оқибатида ҳалок бўлганлар сони 8 796 кишига етди. Шулардан 3 648 нафари болалар, 2 290 нафари аёллардир. Ғазо Соғлиқни сақлаш вазирлиги маълумотларига кўра, жароҳатланганлар 22 219 кишини ташкил этмоқда, 2 030 киши бедарак йўқолган.
UNICEF Ғазо болалар қабристонига айланганини маълум қилди. Шу кунгача Фаластин анклавидаги вояга етмаганлар сони 3,4 мингдан ошди. Бу ҳақда Женевада бўлиб ўтган брифингда БМТ Болалар жамғармасининг расмий вакили Жеймс Элдер маълум қилди.
У Исроил ҳукуматини зудлик билан ўт очишни тўхтатишга ва инсонпарварлик ёрдамининг узлуксиз келиши учун барча ўтиш пунктларини очишга чақирганини такрорлади. “Агарда 72 соат давомида ўт очишни тўхтата олганимизда эди, бу 1000 нафар болани яна хавфсиз ҳолатга келтириш имконини берарди”, – деди UNICEF вакили.
Элдернинг таъкидлашича, болалар ҳаётига таҳдид “бомба ва миномётлар билан чекланмайди”. Сувсизланишдан чақалоқлар ўлими анклавда “ўсиб бораётган таҳдид” бўлиб, Ғазода сув ишлаб чиқариш унга бўлган талабнинг 5 фоизини ташкил қилади. Бунинг сабаби шундаки, кўпчилик тузсизлантириш қурилмалари шикастлангани ёки ёқилғи етишмаслиги сабабли ишламаяпти.
“Дунё етарли дейиши учун Ғазода қанча бола ўлиши керак? – шотландиялик вазир.
Дунё етарли деб айтиши учун Ғазода яна қанча бола ўлиши керак? Ушбу гапни Шотландиянинг биринчи мусулмон вазири Ҳамза Юсуф ўзининг Х саҳифасида ёзиб қолдирди.
Х’даги постида Юсуф Ғазонинг кучли бомбардимон остида қолгани, телекоммуникациялар узилиб қолгани ва деярли 3 ҳафтадан бери минтақада қамалиб қолган оила аъзолари билан боғлана олмаётганини қайд этган.
“Биз фақат улар тунда омон қолишлари учун ибодат қилишимиз мумкин. Дунё етарли дегунча яна қанча бола ўлиши керак?”, дейди вазир.
“Барча ўқувчиларимиз ўлганлиги сабабли 2023/2024-ўқув йили тугатилди…”.
Ижтимоий тармоқларда Ғазода ўқув йили тугагани, чунки кўплаб ўқувчилар ҳалок бўлгани ҳақида кўплаб постлар тарқалмоқда.
“Барча ўқувчиларимиз ўлганлиги сабабли 2023/2024-ўқув йили тугатилди…”, дейилади Инстаграм постларидан бирида. Бироқ 2023/24-ўқув йили бекор қилингани ҳақида ҳеч қандай расмий хабар йўқ ва буларнинг барчаси асоссиз нотўғри маълумотдир.
Твиттердаги энг биринчи пост 26 октябрда, тадбиркор Фарес Шаҳаби вайрон бўлган Ғазодаги болалар тасвири билан бўлишганда пайдо бўлди.
“Ғазода бу ўқув йили мактабларнинг вайрон бўлиши ва ўқувчиларнинг ўлими туфайли бекор қилинди...!”, дея сарлавҳага ёзди.
Ўқув йили бекор қилинмади, лекин болаларнинг қатнашиши даргумон, чунки кўп жойлар вайрон бўлган ва бошқа бинолар фавқулодда бошпана сифатида фойдаланилаётгани ҳақида айтилмоқда.
“Ғазо олдин қамоқхона эди, энди қабристонга айланди”
"Бу қочадиган жойи йўқ, қамалдаги аҳолини атайлаб бомбардимон қилишдир. Ғазо қарийб йигирма йил давомида очиқ қамоқхона бўлиб келган ва тез суръатларда оммавий қабристонга айланиб бормоқда. Ҳалок бўлганларнинг 40 фоизи бегуноҳ болалардир. Бутун бошли оилалар ўлдирилмоқда. Дунё бунга гувоҳ бўлаётган ва кўплаб ҳукуматлар фаол қўллаб-қувватлаётган бир пайтда миллионлаб фаластинлик тинч аҳоли – болалар, аёллар, оилалар халқаро ҳуқуққа зид равишда жазоланмоқда ва озиқ-овқат, дори-дармон, инсонпарварлик ёрдамидан маҳрум қилинмоқда” - Анжелина Жоли.
Таниқли Голливуд актрисаси Анжелина Жоли Ғазо секторида бегуноҳ ҳалок бўлаётган аҳолини ҳақда ўзининг Facebook’даги саҳифасида пост қолдирди.
Унинг сўзларига кўра, инсонпарварлик сулҳини талаб қилишдан бош тортиш ва БМТ Хавфсизлик Кенгашининг ҳар икки томонга ҳам келишувни юклашига тўсқинлик қилиш билан дунё етакчилари бу жиноятларга шерик бўляпти.
Шунингдек, Анжелина Жоли секторга етказиб берилаётган инсонпарварлик ёрдамларига бўлган талаб тобора ортаётганига тўхталди ва бутун инсоният номидан сулҳ талаб қилди.
“Инсоният зудлик билан сулҳ талаб қилади. Фаластин ва исроилликларнинг ҳаёти бутун дунёдаги барча одамларнинг ҳаёти билан тенг аҳамиятга эга”, деди БМТнинг собиқ элчиси.
Актрисанинг билдиришича, у ҳам Ғазо секторига тиббий ёрдам учун хайрия қилган.
“Яна қанча болалар ўлишини кутмоқдасиз?”
Туркиядаги Миср, Эрон, Ироқ, Ливан ҳамда Иордания элчихоналари олдига “яна қанча болалар ўлишини кутмоқдасиз?”, дея ёзилган болалар тобутлари қўйиб кетилди.
Сўнги маълумотларга кўра, ХАМАС 7 октябрда асирга олинган барча исроилликларни озод қилиш юзасидан келишув бўйича Исроил билан тўлиқ муросага тайёр, эвазига эса Исроил қамоқхоналаридаги барча қўлга олинганлар озод этилишини талаб қилмоқда.
Агар бу урушлар тезроқ тугамас экан, дунё яна неча минглаб бегуноҳ болаларнинг жасадини ўз бағрига олишда давом этади…
Журналист: Сабоҳат Саидризо
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
