Миср пойтахти Қоҳирада Фаластин-Исроил можаросини ҳал қилишга қаратилган “тинчлик саммити” бўлиб ўтди. Бироқ унинг иштирокчилари якуний баёнот қабул қила олмади. Бу ҳақда “Reuters” хабар берди.

Хабарга кўра, Европа, Араб ва Африканинг ўнлаб давлатларидан раҳбарлар, ташқи ишлар вазирлари ва дипломатлар иштирок этган Қоҳира саммитида якуний қарор қабул қилинмаган. Иштирокчилар ўртасидаги келишмовчиликка қатор давлатлар фақат бир томонни қоралашда туриб олгани сабаб бўлган.

“The New York Times” манбаларининг қайд этишича, Европа етакчилари Исроилнинг ХАМАСдан ҳимояланиш ҳуқуқи қайд этилмаган қўшма декларация лойиҳасини имзолай олмасликларини олдиндан билган ҳолда ташриф буюрган.

Фаластин маъмурияти раҳбари Маҳмуд Аббос саммит иштирокчиларига фаластинликлар “ўз юртларидан қувиб чиқарилмаслигини” айтди. Ўз навбатида, Франция Ғазога гуманитар коридор яратишга чақирди, бу эса ўт очишни тўхтатишга олиб келиши мумкин.

“Reuters”нинг қайд этишича, Британия ва Германия Исроил ҳарбийларини босиқликка чақирган, Италия эса вазиятнинг янада авж олишига йўл қўймаслик муҳимлигини билдирган.

Саммитга АҚШдан фақат АҚШнинг Мисрдаги муваққат ишлар вакили ташриф буюрган бўлиб, у иштирокчилар олдида чиқиш қилмади. Европа кенгаши раҳбари Чарлз Мишел саммитнинг асосий мақсади “бир-бирларини ўзаро тинглаш” бўлганини қайд этган.

Исроилдан эса вакиллар иштирок этмаган. “Reuters” ва “The New York Times” ушбу учрашувга Исроил вакиллари таклиф қилинганми ёки йўқми, аниқлик киритмаган.

• АҚШ
• Afrika
• Misr
• Саудия Арабистони
• Европа
• саммит