Экология, атроф-муҳитни муҳофаза қилиш ва иқлим ўзгариши вазирлиги томонидан ноқонуний овнинг олдини олиш мақсадида рейд тадбирлари ўтказиб келинмоқда.

Рейд тадбирлари давомида “Ўзбекистон овчи ва балиқчилар спорт бирлашмаси”нинг Андижон, Бухоро, Навоий, Қашқадарё, Наманган, Сурхондарё, Хоразм вилоятлари бўлинмалари томонидан ов йўлланмаларининг тўлиқ қайтарилиши назоратга олинмагани маълум бўлди.

Натижада овчилар томонидан 2020–2022 йиллар давомида жами 9690 та ов йўлланмалари “Ов қилиш ва овчилик хўжалиги тўғрисида”ги Қонуннинг 29-моддаси талабларига зид равишда фойдаланилганидан сўнг қайтарилмаган. Бунинг оқибатида ов йўлланмаларидан такрорий фойдаланиш ҳамда ноқонуний ов қилишга шароит яратиб берилган.

Экология вазирлиги Сирдарё вилояти бўлими фаолиятини ўрганган. Натижада ов хўжалигининг ов қилиш жойларини бериш тўғрисидаги шартномаси амал қилиш муддати 2022 йил 31 декабрда тугаган бўлса-да, хўжалик томонидан 2023 йил давомида 25 минг бош ҳайвонларни овлаш учун ноқонуний йўлланмалар сотилгани маълум бўлган.

Шунингдек, “Ов қилиш ва овчилик хўжалиги тўғрисида”ги Қонуннинг 23-моддаси талабларига зид равишда, 20 та ҳолатда мазкур хўжалик томонидан сотилган рухсатнома асосида овчилар томонидан тақиқланган муддатларда 49 та ёввойи қуш овланган.

2023 йилдаги назорат тадбирларида Республика бўйича ов қилиш ва балиқ овлаш қоидаларини бузиш билан боғлиқ жами 997 та ҳолат аниқланган ва 995 нафар шахсга нисбатан 1,7 млрд сўмлик чоралар кўрилган.

Бундан ташқари, 2024 йилнинг I ва II чоракларида ов қилиш ва балиқ овлаш қоидаларини бузиш билан боғлиқ 287 та ҳолатда 298 нафар шахсга нисбатан 957 млн сўмлик жарима белгиланган.

Ушбу қонун бузилиши ҳолатлари бўйича ҳуқуқни муҳофаза қилувчи органларга материаллар тақдим этилган бўлиб, бугунги кунда ҳуқуқий баҳо берилмоқда.

Маълумот учун, 28 февралдан “Ов қилиш ва овчилик хўжалиги тўғрисида”ги Қонунга мувофиқ ов қилиш муддати якунланган. Тақиқ 15 августгача давом этади.

• Давлат экология қўмитаси