Жорий йилнинг 1 июнь куни Самарқанд шаҳрида 11-синф битирувчилари – Шоҳрух Бобораҳимов, Мурод Саидалимов, Озод Ўткиров ва Жасур Эшназаров 4-қават балконидан тушиб кетган қизчанинг ҳаётини сақлаб қолишди.

Қайд этилишича, улар мактабдаги биринчи имтиҳонни топшириб, шаҳардаги кўп қаватли уйлардан бири ёнидаги скамейкада суҳбатлашиб ўтирган вақтда боши панжара орасига тиқилиб қолиб, танаси ҳавода осилиб турган кичкина қизчани кўришади.

Ўқувчилардан бири дарҳол қизалоқнинг ота-онасига хабар бериш учун тепа қаватга югурган, қолган уч йигит эса қизалоқ осилиб қолган балкон остида тирик қутқарув панжарасини ҳосил қилган.

Қизалоқ пастга қулаганидан сўнг йигитлар уни тутиб олишга муваффақ бўлишган. Кейинроқ аниқланишича, онаси уй ишлари билан овора бўлиб юрган пайтда, қизча эшигининг қулфи бузилган балконга чиқиб олган.

“Қизалоқ пешонасидан енгил жароҳат олган ва ҳозирда ўзини яхши ҳис қиляпти”, – дейилади хабарда.

• Favqulodda holat
• Самарқанд