Аввал хабар қилинганидек, жорий йилнинг 15–16 сентябрь кунлари Самарқанд шаҳрида Шанхай ҳамкорлик ташкилоти саммити ўтказилади.

Мазкур катта воқеликка тайёргарлик кўриш баробарида ушбу саммит доирасида ўтказиладиган халқаро даражадаги кўргазмага ҳам қизғин ҳозирлик кўрилмоқда.

Хусусан, Туризм ва маданий мерос вазирлиги лойиҳаси асосида амалга оширилаётган пленерда бир қатор чет-эл мамлакатларидан ташриф буюрган таниқли, иқтидорли рассомлар «Ипак йўли» Халқаро туризм ва маданий мерос университети студияларида Самарқанд ва Бухоро шаҳарларини ўзларининг санъат асарларида акс эттиришади.

Маълум қилинишича, тажрибали рассомлардан иборат илк делегация Россия, Тожикистон, Қозоғистон, Қирғизистон каби МДҲ мамлакатларидан ташриф буюрган бўлса, энди Ҳиндистон, Покистон, Япония каби Осиёнинг жанубий ва шарқий ҳудудларидан, Италия, Испания, Германия сингари Европа қитъаси мамлакатларидан ҳам таниқли рассомлар пленерда иштирок этиш учун Ўзбекистонга келиши режалаштирилган.

Қайд этиш мумкин, ШҲТ саммити доирасида ўтказиладиган халқаро кўргазмада намойиш этиладиган суръатларда Ўзбекистоннинг тарихий, диққатга сазовор ҳудудларида жойлашган маданий мерос объектлари, азалий қадриятлари, тарихини, урф-одатлари акс этади.

Кейинчалик эса, тақдим этилган асарлар томошабинларни ўзбек халқининг ноёб тарихий ва маданий мероси, шунингдек, ШҲТ мамлакатларининг ўзига хос замонавий тасвирий санъати билан таништириш мақсадида шу йилнинг сентябрь ойида, ШҲТ саммити доирасида ташкил этиладиган халқаро кўргазмада намойиш этилади.

• Самарқанд
• ШҲТ
• рассом