Сирдарё вилоятида суд тизими ва банк соҳаси вакиллари иштирок этган коррупцион ҳолат фош этилди. Тезкор тадбир давомида мансабдор шахсларнинг пул эвазига суд қарорига таъсир ўтказишга урингани аниқланиб, уларнинг ноқонуний фаолиятига чек қўйилди.

Давлат хавфсизлик хизмати томонидан Прокуратура органлари ҳамда Судьялар олий кенгаши билан ҳамкорликда ўтказилган тезкор тадбирда Сирдарё вилояти суди иқтисодий ишлар бўйича судлов ҳайъати судьяси ва “Агробанк” АТБ Гулистон филиали мансабдор ходими ноқонуний ҳаракатлар устида ушланди.

Аниқланишича, судья ўз юритувида бўлган, Гулистон шаҳрида тадбиркор томонидан қурилган кўп қаватли бино бўйича кассация тартибида кўрилаётган ишни унинг фойдасига ҳал қилиниши мумкинлигини билган ҳолда, банк ходими билан тил бириктирган. Улар ушбу ишни “ижобий ҳал қилиш” эвазига 7 500 АҚШ доллари талаб қилишган.

Тезкор тадбир давомида банк ходими олдиндан 5 500 долларни қабул қилган. Кейинчалик суд қарори тадбиркор фойдасига чиққанидан сўнг, у судьяга 3 600 доллар топшираётган вақтда ашёвий далиллар билан қўлга олинган.
Ҳозирда мазкур шахсларга нисбатан жиноят иши қўзғатилиб, дастлабки тергов ҳаракатлари олиб борилмоқда. Расмийлар фуқароларга коррупция ҳолатларига дуч келганда 1520 қисқа рақамига мурожаат қилишлари мумкинлигини эслатмоқда.