11 март куни Тошкентда 3 нафар йигит ҳайдовчилик гувоҳномасиз, давлат рақами ечилган ҳамда милтилловчи чироқлар ўрнатилган Жентра автомобилида ҳаракатлангани аниқланиб, йўл ҳаракати қоидаларини бузган.

Улар қарама-қарши йўналишга чиқиб, хавфли ҳаракатлар содир этганидан сўнг ҳуқуқ-тартибот органлари томонидан тўхтатилган.

Аниқланишича, 2 нафар йигитга 5 суткадан маъмурий қамоқ жазоси тайинланган, яна бирига эса 1 млн 236 минг сўм жарима белгиланган.

Автомобиль эгаси эса транспорт воситасини ҳайдовчилик ҳуқуқига эга бўлмаган шахсга бергани учун 2 млн 60 минг сўм миқдорида жаримага тортилган. Йўл ҳаракати қоидаларига амал қилмаслик жиддий ҳуқуқий жавобгарликка сабаб бўлиши эслатилмоқда.