Аввалроқ жорий йил 2 март куни Сурхондарё вилояти Сариосиё туманидан оқиб ўтувчи Тўпаланг дарёси қирғоғидан маҳаллий аҳоли томонидан мис тангалар топилгани ва 3 март куни Маданий мерос агентлиги, Ўзбекистон давлат санъат музейи, Термиз археология музейи вакиллари томонидан маҳаллий аҳолидан 512 дона мис тангалар белгиланган тартибда олиниб, Термиз шаҳридаги Археология музейи фондига топширилгани ҳақида маълум қилинган эди.

Маданий мерос агентлиги, шунингдек, мазкур ҳудуд назоратга олингани ҳамда ашёларнинг талон-торож қилиниши олдини олиш чоралари кўрилаётгани ҳақида маълум қилди.

Жорий йилнинг 9 март куни ҳам мазкур ҳудуддан 4 дона мис тангалар топилган.

Маълум қилинишича, прокуратура органлари томонидан қўшимча равишда маҳаллий аҳоли томонидан олиб қўйилган 620 дона мис танга ва 1 дона шахмат донаси ихтиёрий равишда олиниб, музей фондига топширилган.

Бундан ташқари, вилоят прокуратураси, маданий мерос бошқармаси ҳамда археология музейи ходимларидан иборат таркибда махсус экспедиция ташкил этилган.

Археологик олимларнинг дастлабки хулосасига кўра, ушбу ашёлар Мирзо Улуғбек ҳукмронлиги (XV аср) даврида зарб этилган пул тангаларининг шу кунга қадар топилган энг катта ва яхши сақланган маданий мерос хазинаси ҳисобланади.

Ҳозирда ушбу манзилда қидирув ишлари давом эттирилаётган бўлиб, Бош прокуратура томонидан назоратга олинган.

• Мирзо Улуғбек
• Сурхондарё
• Хазина