Ташқи меҳнат миграцияси агентлиги Жанубий Кореяга ишга кетиш билан боғлиқ жараёнлар ҳақида ижтимоий тармоқларда тарқалган хабарларга муносабат билдирди.

Қайд этилишича, Жанубий Кореяда ишлаш учун ўтказилаётган имтиҳонларда ноқонуний хатти-ҳаракатларни амалга ошириш мақсадида турли гуруҳларнинг шаклланиши, имтиҳонларга электрон воситалар, шпаргалкаларни олиб киришга уриниш, ушбу режалар амалга ошмагач, турли бўҳтонлар тарқатиш ҳолатлари учрамоқда.

Маълумотларга кўра, 2023 йилда имтиҳон бошлангандан буён EPS-Topic имтиҳони тартибларига риоя қилмаган 100 нафарга яқин номзод тестдан четлаштирилган.

“Агар ижтимоий тармоқларда баён этилганидек тест имтиҳонига ноқонуний, хусусан, 40 ёшдан катталарнинг кириши каби асослантирилган ҳолатлар мавжуд бўлса, далилларни Агентликка ёки ҳуқуқ-тартибот органларига тақдим қилиш сўралади.

Шу муносабат билан, юртдошларимиздан асослантирилмаган турли хабарларга ҳамда Корея Республикасига ишга кетиш билан боғлиқ жараёнларда воситачилик хизматларини таклиф этаётган шахсларга ишонмасликни сўраймиз.

Агентлик меҳнат миграцияси барча жараёнларнинг очиқ, адолатли ва қонуний бўлиши тарафдори ҳамда соҳага оид барча саволларга жавоб беришга тайёрлигини маълум қилади”, – дейилади хабарда.

• Janubiy Koreya
• Меҳнат