Бугун, 13 март куни Тожикистон ва Қирғизистон президентлари Имомали Раҳмон ва Садир Жапаров Қирғизистон Республикаси ҳамда Тожикистон Республикаси ўртасида Бишкекда Давлат чегараси тўғрисидаги шартномани имзолади. Бу ҳақда Тожикистон президенти матбуот хизмати хабар берди.

Маълум бўлишича, ҳужжат Қирғизистоннинг “Бирдамлик маркази” давлат қароргоҳида Тожикистон президентининг Қирғизистон пойтахтига давлат ташрифи доирасида имзоланган.

“Бугун биз мамлакатларимиз ўртасидаги чегара масалалари бўйича тарихий қарорни қабул қилмоқдамиз”, – деган Имомали Раҳмон.

Унинг сўзларига кўра, мазкур шартнома давлатлараро муносабатларни янада кенгайтириш учун мустаҳкам асос яратади.

Садир Жапаров ҳам Тожикистон-Қирғизистон чегарасининг делимитацияси ва демаркацияси бўйича ҳукумат комиссияларининг самарали фаолиятини алоҳида таъкидлаган.

Имомали Раҳмон яқин кунларда Хўжандда Тожикистон, Қирғизистон ва Ўзбекистон давлат чегараларининг туташ нуқтаси бўйича келишув имзоланиши режалаштирилганини ҳам маълум қилган.

Маълумот учун, икки мамлакат чегараси 2021 йилнинг май ойида қуролли тўқнашув оқибатида ёпилган эди. Мамлакатлар ўртасида чегарани делимитация қилиш бўйича музокаралар 2002 йил декабрь ойидан буён давом этмоқда. Ушбу масаланинг ҳал этилмагани икки давлат аҳолиси ва ҳарбийлари иштирокидаги доимий можароларга сабаб бўлиб келган, уларда ўқотар қуроллар ҳам ишлатилган.

• Чегара
• Президент
• Қирғизистон
• Тожикистон
• shartnoma