Тожикистон ҳукумати мамлакатда истиқомат қилаётган афғон қочқинларини оммавий депортация қилиш фактини расман тасдиқлади. Бу ҳақда Миллий хавфсизлик давлат қўмитаси Чегара қўшинлари хабар берди.

Идоранинг таъкидлашича, “минтақа ва дунёдаги мураккаб сиёсий-иқтисодий вазият” туфайли мамлакатга чет элликлар оқими сезиларли даражада ошган. Шу сабабли кўплаб муҳожирлар Тожикистонда ноқонуний яшаётгани ёки белгиланган қоидаларни бузаётгани аниқланган.

Текширувлар давомида гиёҳванд моддаларнинг ноқонуний айланиши, экстремизмни тарғиб қилиш, қочқин мақомини олиш учун ҳужжатларни қалбакилаштириш, Тожикистондан транзит ҳудуд сифатида фойдаланиш ҳолатлари аниқланган. Шу муносабат билан, қонунбузарларни чиқариб юбориш чоралари кўрилмоқда.

Тожикистондаги афғон муҳожирлари қўмитаси раҳбари Мусаввир Баҳодурийнинг сўзларига кўра, афғонлар “номақбул соқол қўйиш, ноўрин хатти-ҳаракатлар, спиртли ичимликлар истеъмол қилиш, можароларда иштирок этиш, ижтимоий тармоқларда сиёсий фикрлар билдириш, диний тарғибот олиб бориш, ҳужжатсиз ишлаш ва фуқароларни ҳақорат қилиш” каби сабаблар билан чиқариб юборилмоқда.

Шу билан бирга, Баҳодурийнинг ўзи июль ойидаги оммавий депортация ҳақидаги хабарларни асоссиз деб атаган. У “қочқинлардан ҳеч бири қўмитага расман мурожаат қилмаганини” айтган.

Расмий статистика (УНҲCР — БМТнинг Қочқинлар бўйича Олий комиссарлиги) 2024 йил охирида Тожикистонда тахминан 9 900 нафар рўйхатга олинган афғон қочқинлари мавжудлигини кўрсатади. Бироқ кўплаб манбалар ҳозирда бу рақам 10 000–13 000 атрофида ёки ундан ҳам юқори бўлиши мумкинлигини таъкидламоқда.

• Афғонистон
• Депортация
• Тожикистон