Покистоннинг Панжоб вилоятида ҳалокатли тошқин юз берди. Маҳаллий ОАВлар тошқинни “тарихдаги энг йирик” деб атамоқда. Сўнгги маълумотларга кўра, табиий офат 97 кишининг ўлимига сабаб бўлган. Табиий офат натижасида 2,4 миллионга яқин аҳоли эвакуация қилиниши керак эди. Бу ҳақда Покистоннинг Dawn нашри хабар берди.

Табиий офат инфратузилмага катта зарар этказган. Нашр маълумотларига кўра, вилоят бўйлаб 4,5 мингдан ортиқ қишлоқлар сув остида қолган. Бундан ташқари, 1,9 миллион бош қорамол табиий офат зонасидан эвакуация қилинган.

Вазият зарар кўрган ҳудудларда электр таъминоти ва уяли алоқа билан катта муаммолар юзага келган. Ушбу ҳолат қутқарув ишларини, жабрланганларга ёрдам беришни қийинлаштиради. Ҳозирда озиқ-овқат, дори-дармон ва бошқа зарур ресурсларни етказиб беришда дронлардан фойдаланилмоқда.

Мамлакат табиий офатларга қарши кураш бошқармаси (PDMA) маълумотларига кўра, Панжобдаги сув тошқини июнь ойининг охиридан бери Покистонда содир бўлган табиий офатларнинг энг йириги бўлган. Мамлакатнинг турли минтақаларида содир бўлган тошқинлар натижасида 950 дан ортиқ одам ҳалок бўлган. Шунингдек, 1060 дан ортиқ киши жароҳат олиб, 8,4 мингдан ортиқ уйлар бутунлай вайрон бўлган ёки жиддий зарар кўрган.

• Покистон
• Suv toshqini
• Табиий офат