Ижтимоий тармоқларда Миробод туманидаги 110-сонли ихтисослаштирилган давлат умумтаълим мактаби кийиниш хонасига видео кузатув камералари ўрнатилганлиги ва бундан ота-оналар норози эканлиги ҳақидаги хабарлар тарқалди.

Тошкент шаҳар халқ таълими Ишчи гуруҳи мазкур ҳолат юзасидан ўрганиш ишларини олиб борди. Унга кўра, ҳақиқатан мактаб маъмурияти ўқувчилар кийиниш хонасига видео кузатув камераси ўрнатган. Таъкидланишича, бу этика ва ахлоқ қоидаларига зид бўлсада, мазкур ҳолатни мактаб директори У.Рашидова кейинги вақтларда ўқувчилар ўртасида ўғирлик ва шунга ўхшаш ҳолатларни олдини олиш, улар ўртасида тартиб-интизом ўрнатиш, назоратни кучайтириш ҳамда ўқувчилар ҳушёрлигини ошириш мақсадида ота-оналар кузатув кенгаши таклифига кўра, камера ўрнатишга мажбур бўлганлиги билан изоҳлаган.

Маълумотларга кўра, ўқувчилар жисмоний тарбия дарси машғулотларига чиққан маҳалида бир неча маротаба мобил телефон, тақинчоқлар, пуллар йўқолган. Бу каби нохуш ҳолатлар бўйича бир неча маротаба ички ишлар идоралари вакиллари, ота-оналар иштирокида баённомалар тузилган.

Камералар фақат юқоридаги каби кўнгилсиз ҳолат сабабчиларини аниқлаш учун ўрнатилган. Унда камера тасвирга олган лавҳалар жамоатчиликка тақдим этилмаган, видео кузатув фақат директор хонасида ўрнатилган "пульт" орқали амалга оширилган. Нафақат, кийиниш хонасидаги, балки таълим муассасасидаги мавжуд 250 та видео кузатув камералари фақатгина мактаб директори назоратида бўлиши қатъий белгилаб қўйилган.

Қайд этилишича, кийиниш хонасидаги камералар кеча мактаб маъмурияти томонидан олиб ташланган.

• Мактаб
• kamera