Тошкент вилоятида Кадастрлар палатаси филиали муҳандиси 10 400 доллар билан ушланди. Бу ҳақда Бош прокуратура ҳузуридаги Департаментнинг Иқтисодий жиноятларга қарши курашиш департаменти матбуот хизмати хабар берди.

Қайд этилишича, Бош прокуратура ҳузуридаги Департаментнинг Янгийўл туман бўлими томонидан ва ИИБ ходимлари билан ҳамкорликда тезкор тадбир ўтказилган.

Ушбу тадбир давомида фуқаро И.А. ва Кадастрлар палатаси Янгийўл тумани филиали муҳандиси Ш.Х. “У.Ю.” агрофирмасига қарашли 32 сотих ер майдонини фуқаро Ш.га фирибгарлик йўли билан 29 000 АҚШ долларига сотишга келишиб, танишлари орқали ҳужжатларни расмийлаштириб бериши эвазига олдиндан 10 400 АҚШ долларини олган вақтида ашёвий далиллар билан ушланган.

Шу каби, Департамент, ДХХ ва ИИВнинг Андижон вилояти бошқармалари томонидан ўтказилган тезкор тадбирда, Улуғнор тумани фермер, деҳқон хўжаликлари ва томорқа эгалари кенгаши ҳисобчиси Д.Ш. фуқаро Ш.нинг опаси М.нинг номига ташқил қилинган “Ёшлар боғи” ҳудудидан 3,5 гектар ер майдонини деҳқончилик қилиш учун ажратиб бериш эвазига 4 млн сўм пулини олиб, кейинчалик ушбу ер майдонини онлайн-ауцион орқали ютиб олиб бериш ва кадастр хужжатларни расмийлаштириб бериш эвазига 1 000 АҚШ долларини олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.

• Жиноят
• Toshkent viloyati
• Ер-кадастр