Ижтимоий тармоқлардаги “Қўйлиқ даҳасида бир гуруҳ шахслар ўртасида жанжал содир бўлди, алкоголь таъсирида бўлган бир гуруҳ шахслар бир аёл ва бир болани калтаклагани айтилмоқда”, деган мазмунда хабарлар тарқалди.

Ушбу ҳолат юзасидан Миробод тумани ҳокимлиги расмий муносабат билдирди:

Миробод тумани ИИО ФМБ 4-сонли ИИБ навбатчилик қисмига келиб тушган хабарга кўра, мазкур ҳодиса 12 ноябрь куни содир бўлган.

20 яшар фуқаро Х.В. ўз танишлари 23 ёшли М.Б. ва 18 ёшли М.Алар билан Spark русумли автомобилда Мунис кўчаси бўйлаб ҳаракатланиб, Қўйлиқ-5 даҳасига кетаётган вақтларида, 34 ёшли А.Б. бошқарувида бўлган Nexia-3 русумли автомобиль билан бир-бирига йўл бермай, ўртада келишмовчилик юзага келган.

Spark'даги йўловчилар - М.Б ва М.А. ҳамда Nexia-3 ҳайдовчиси А.Б. ва унинг шериги 21 ёшли Ю.М. ўзаро гап талашиб, жанжаллашишган.

Жанжал Spark ҳайдовчиси – Х.В. томонидан видеога олиниб, ижтимоий тармоқларга жойланган.

Ҳодиса оқибатида Spark йўловчиларидан бири – М.Б. Тошкент Давлат стоматология клиникасига мурожаат этган. Шифокорлар томонидан фуқарога юқори лаб соҳаси эзилиши ва йиртилиши, шунингдек, чап ёноқ соҳаси шилиниши ташхиси қўйилган.

Жанжалда иштирок этган қолган фуқаролар тан жароҳати олмаган.

Мазкур ҳолат юзасидан Миробод тумани ИИО ФМБ томонидан Ўзбекистон Республикаси Жиноят кодексининг 277-моддаси 2-қисми билан жиноят иши қўзғатилиб, ҳозирги вақтда тергов ҳаракатлари олиб борилмоқда.

• ИИБ
• Janjal
• Миробод