Ижтимоий тармоқларда бир нечта шахслар фуқарони ураётганлиги акс этган видео тарқалиб, турли муҳокамаларга сабаб бўлмоқда. Мазкур ҳолат юзасидан Тошкент шаҳар ИИБ расмий муносабат билдирди.

Жорий йилнинг 1 июль куни тахминан соат 20:25 ларда Юнусобод тумани, Ифтихор кўчасида олдиндан ўзаро таниш бўлган фуқаролар қарз масаласида оғзаки жанжаллашган. Уч фуқаро жамоат тартибини бузган ҳолда жамиятда юриш-туриш қоидаларини қасддан менсимай, танишларини уриб тан жароҳати етказишган. Сўнг ушбу шахсни ўзи келган автомашинада уйи олдига олиб боришган.

Жабрланувчига шифохонада бирламчи тиббий ёрдам кўрсатилганидан сўнг у уйига кетган.

Мазкур ҳолат юзасидан Юнусобод тумани ИИО ФМБ ҳузуридаги Тергов бўлими томонидан Ўзбекистон Республикаси Жиноят кодексининг 277-моддаси (“Безорилик”) билан жиноят иши қўзғатилган. Гумон қилинувчилар процессуал тартибда ушланган. Ҳозирда тергов ишлари давом этмоқда.

• Жиноят
• Тошкент