Сентябрь ойида Женевада Халқаро саратонга қарши кураш иттифоқи (UICC) конгресси бўлиб ўтди. Халқаро гуруҳ томонидан тадқиқотнинг илк натижалари тақдим этилди ва у ҳайратлантирди. Америка онкология ҳамжамияти (ACS) ҳамда ЖССТнинг Саратонни тадқиқ этиш бўйича халқаро агентлиги тадқиқотчилари саратонга чалиниш ҳолатлари ошишини аниқлаш мақсадида дунёнинг 50 та мамлакатидан тўпланган маълумотларни ўрганди. Ушбу давлатларнинг 14 тасида саратонга чалиниш ҳолати фақат ёшларда ошган бўлиб, кекса инсонларда бу борадаги кўрсаткичлар барқарорлигича қолмоқда.

Дунёда 40 ёшгача бўлган инсонлар орасида кўкрак саратони, йўғон ичак саратони ва унинг бошқа турларидан вафот этиш ҳолатлари ортиб бормоқда. Сўнгги 10 йилда 25-49 ёшгача бўлган инсонлар орасида йўғон ичак саратони даражаси 24 мамлакатда, жумладан, Буюк Британия, АҚШ, Франция, Австралия, Канада, Норвегия ва Аргентинада ошган.

АCSънинг янги ҳисоботига кўра, охирги 10 йилда аёллар ўртасида кўкрак саратонидан вафот этиш ҳолати тахминан 10 фоизга камайган бўлса-да, ушбу касалликка чалиниш ҳолати йилига 1 фоизга ошмоқда.

Олимларнинг қайд этишича, саратон касаллигининг ёшлар орасида кўпайишига семириш ва метаболик синдром сабаб бўляпти. Охирги тадқиқотлардан маълум бўлишича, 18-40 ёшгача бўлган инсонларда саратоннинг 18 тагача тури ортиқча вазн туфайли юзага келмоқда.

Шунингдек, антибиотиклардан фойдаланиш ҳам саратоннинг пайдо бўлишига хизмат қилиши мумкинлиги устида ўрганишлар олиб борилмоқда. 2000 йилда беш ёшгача бўлган болалар ўртасида антибиотик қабул қилиш ҳар 1000 кишига 9,8 нафарни ташкил этган бўлса, 2018 йилга келиб, ушбу кўрсаткич 14,3 нафарга етган.

• Lifestyle
• саломатлик