Келгуси йил пойтахтимизнинг Яшнобод туманида ёшлар ўртасида ёзги Осиё ўйинлари ўтказилади. Шу муносабат билан ҳозирда ушбу манзилда Олимпия шаҳарчаси барпо этилмоқда. Бу ҳақда, президент матбуот хизмати хабар берди.

Кейинчалик ушбу жойдан самарали фойдаланиш мақсадида Олимпия шаҳарчасида Ўзбекистон давлат спорт академияси ташкил қилинади. Бундан ташқари, ушбу муассаса ҳузурига Жисмоний тарбия ва спорт илмий тадқиқот институти ҳамда Мутахассислар малакасини ошириш институти ҳам ўтказилади. Академия тизимида Спорт тиббиёти илмий-амалий маркази, Ахборот кутубхона маркази, Ўзбекистон тарихи ва хорижий тилларни ўқитиш маркази очилади.

Қайд этилишича, 2025-2026 ўқув йилидан бошлаб, академияга 3 та бакалавр йўналиши ва 6 та магистратура мутахассислиги бўйича қабул бошланади. Битирувчи талабаларга тўғридан-тўғри 6 йиллик тренерлик малака сертификати берилади. Олимпия ва паралимпия коллежларидан селекция қилинган битирувчилар тўғридан-тўғри иккинчи курсга қабул қилинади.

• Қарор
• Спорт
• Тошкент