Бухорода Ўзбекистон Республикаси транспорт вазирлиги вакилларининг Туркия Республикаси транспорт ва инфратузилма вазирлиги делегацияси билан ишчи учрашуви бўлиб ўтди. Бу ҳақда Транспорт вазирлиги хабар берди.

Учрашув давомида томонлар йўловчи ва юк ташиш соҳасида икки томонлама ҳамкорликни ривожлантириш, шунингдек, Туркия тажрибаси асосида Ўзбекистонда автовокзал ва йўловчи марказларини ташкил этиш ва модернизация қилиш истиқболларини муҳокама қилдилар.

Хусусан, Туркиянинг “ақлли транспорт тизими”ни жорий этиш ва йўловчи ташиш соҳасида транспорт инфратузилмасини ривожлантириш бўйича тажрибасини ўрганиш бўйича келишувга эришилди.

 Шунингдек, учрашув давомида халқаро юк ташиш жараёнида миллий ташувчилар учун қулайликлар яратиш мақсадида соҳада рақамлаштириш жараёнларини чуқурлаштириш билан боғлиқ жиҳатлар кўриб чиқилди.

Ҳозирги вақтда “икки томонлама” ва “транзит” ташиш учун рухсатномалар электрон шаклда (Э-пермит) расмийлаштирилади. Томонлар яқин келажакда рухсатномаларни Э-пермит тизимига ўтказиш жараёнини якунлашларини ва тизимни синов режимида ишга туширишларини таъкидладилар.

• Ўзбекистон
• Transport
• Туркия