2025 йилда Россия камида 902 нафар Ўзбекистон фуқаросини урушга ёллашга муваффақ бўлган. Бу ҳақда россиялик ҳарбийларнинг ихтиёрий равишда асирга тушишига кўмаклашувчи Украинанинг “Хочу жит” (“Яшашни хоҳлайман”) давлат лойиҳаси хабар берди.

“Биз Ўзбекистондан келган ёлланма аскарлар рўйхати (1110 нафар)ни эълон қилганимиздан сўнг мамлакатда фуқароларнинг жанговар ҳаракатларда иштироки ҳақидаги маълумотларни текшириш бошланди, бироқ, ёлланма аскарларни жиноий таъқиб қилиш кучайганига қарамай, Россия уларни ёллаш бўйича саъй-ҳаракатларни кучайтиришда давом этмоқда”, – дея қайд этган лойиҳа.

Унга кўра, яқинда Россия фуқаролигини олган мигрантларга нисбатан ёллаш кўпинча шантаж ва алдовлар орқали содир этилади. “Натижада бугун Украинада 33 давлат фуқаролари асирликда сақланмоқда. Хорижий ҳарбий асирлар сони бўйича Ўзбекистон биринчи ўринда туради”, – дейилади баёнотда.

“Хочу жит”, шунингдек, Россия қамоқхоналарида жазо муддатини ўтаётганлар таҳдид ва руҳий босим орқали урушга жалб қилинаётганини қўшимча қилган.

• Ўзбекистонлик
• Россия
• Украина
• Уруш
• askar