Туркманистон президенти Сердар Бердимуҳамедов Ўзбекистон юк ташиш транспортининг Россия жанубига чиқишини таъминлашини маълум қилди. Бу ҳақда “Нейтрал Туркманистон” газетаси хабар берди.

“Мамлакатимизнинг шарқий минтақаси ва марказини боғловчи юқори тезликда ҳаракатланувчи автомобиль йўлининг Ашхобод-Туркманбоши (собиқ Красноводск) автобанасига уланиши қўшни Ўзбекистон Республикасидан юк машиналарининг Каспий денгизидаги Халқаро денгиз портига, у ердан эса юк машиналари учун Кавказ, Европа, жанубий Россия ва Шимолий Эрон, денгиз йўллари бўйлаб Форс ва Уммон бўғозларига чиқиш имконини беради”, – деди Туркманистон президенти.

Бердимуҳамедовнинг сўзларига кўра, минтақадаги барча давлатларнинг диққат марказида Ўзбекистон-Туркманистон-Эрон-Уммон халқаро транспорт коридорини янада фаоллаштириш ва Афғонистон-Туркманистон-Озарбайжон-Грузия йўналиши бўйлаб йўлак яратиш масалалари турибди.

Ўтган йилнинг ноябрь ойида Ўзбекистон хорижий давлатларга экспорт ҳажмини ошириш учун Латвиянинг Вентспилс эркин портидан унга туташ эркин иқтисодий зонадан фойдаланишни режалаштираётгани хабар қилинган эди.

• Ўзбекистон
• Transport
• Туркманистон