Сенатнинг навбатдаги ялпи мажлисида Президент администрацияси ҳузуридаги Ахборот ва оммавий коммуникациялар агентилиги раҳбари Асаджон Хўжаев зарарли ахборотларни интернет тармоқлари орқали тарқалиш ва уларнинг назорати хусусида тўхталиб ўтди.

2021-2022 йилларда веб-сайтларда диний ҳамда миллий-этник адоватни қўзғовчи 18 мингдан ортиқ материаллар аниқланган. Жами 3 134 та хорижий веб-сайтлар аниқланган бўлиб, улар порнография, зўравонлик, беҳаёлик ва нарко-хизматларни тарғиб қилувчи сайтлар бўлгани учун тегишли идоралар билан биргаликда Ўзбекистон ҳудудида уларга кириш чекланган.

“Ўзимизнинг веб-сайтларда ҳам бу каби қонунбузарликлар аниқланиб туради. Масалан, 9,5 мингта “uz” доменида рўйхатдан ўтган сайтларда беҳаёлик, маънавий бузуқлик, зўравонлик, қимор, алкогол ёки тамаки маҳсулотларини реклама қилиш ёки тарғиб қилиш каби ҳуқуқбузарликлар аниқланган. Бу борада ҳуқуқни муҳофаза қилувчи органлар билан ҳамкорликда ишлаб, 2022 йилнинг 1-чорагида жами 952 та ҳуқуқбузарлик ҳолатлари бўйича ишларни амалга ошириб келяпмиз”, – дейди АОКА раҳбари.

Шунингдек, эгалари хорижда бўлган ижтимоий тармоқ ва мессенжерлардаги канал ва шу каби платформаларда тарқатилаётган зарарли ахборотлар бўйича ҳам иш олиб борилаётгани ва бу борада хорижий маъмуриятлар билан алоқалар ўрнатилгани таъкидланди.

“Аммо бу борадаги ишлар қаноатлантирадиган даражада эмас, яъни юборилган сўровлардан 60-70 фоизигина кўриб чиқиляпти”, – дейди Хўжаев.

• Ижтимоий тармоқ
• Порнография
• Сенат
• веб-сайт