Буюк Британия ҳукумати Европа давлатлари етакчилари ҳамда Украина президенти Владимир Зеленский томонидан имзоланган қўшма баёнотни эълон қилди. Унда Украинадаги жанговар ҳаракатларни ҳозирги фронт чизиғида тўхтатишга чақирилган.

Мазкур баёнот Буюк Британия, Германия, Франция, Италия, Полша, Норвегия, Дания, Финляндия давлат ва ҳукумат раҳбарлари, шунингдек, Европа Иттифоқи Кенгаши ва Еврокомиссия раислари томонидан имзоланди.

“Россиянинг вақтни чўзиш тактикаси Украина тинчликка жиддий интилаётган ягона томон эканини қайта-қайта кўрсатмоқда”, — дейилади баёнотда.

17 октябрь куни Оқ уйда АҚШ ва Украина президентларининг учрашуви бўлиб ўтди. Учрашувдан сўнг Трамп пост эълон қилиб, Зеленскийга Путин каби қотилликларни тўхтатишни ва келишув тузишни тавсия қилганини билдирди.

“Бизнинг фикримизча, улар шунчаки ўзлари турган чегараларда, фронт чизиғида тўхташлари керак. Иккала томон ҳам ғалаба қозонсин, Тарих ҳукм чиқарсин!” — деб ёзди Трамп. Зеленский Трампнинг ҳозирги фронт чизиғида жанговар ҳаракатларни тўхтатиш ва музокараларни бошлаш таклифини қўллаб-қувватлади.

Россия, ўз навбатида, Трампнинг бу ғоясини рад этди. Россия ташқи ишлар вазири Сергей Лавров 21 октябрь куни Россия “ҳеч нарсага олиб келмайдиган” зудлик билан ўт очишни тўхтатиш эмас, балки узоқ муддатли тинчликка эришиш формуласига “тўлиқ содиқ қолишини” маълум қилди. “Шунинг учун ҳозир Вашингтондан зудлик билан тўхташ кераклиги ҳақида гапира бошлашганида, бошқа ҳеч нарсани муҳокама қилишнинг ҳожати йўқ, тўхташ керак, кейин эса тарих ҳукм чиқараверсин. Тушуняпсизми, агар шунчаки тўхташ керак бўлса, бу можаронинг асл сабабларини унутиш дегани”, — деди Лавров.

• Россия
• Трамп
• Украина
• Уруш
• Yevropa Ittifoqi
• Зеленский