Исроил вазири яҳудийларни Нью-Йоркдан чиқиб кетишга чақирди

Мазкур мурожаат Зоҳран Мамданийнинг Нью-Йорк мери этиб сайланиши фонида янгради.

Исроилнинг Диаспора масалалари ва антисемитизмга қарши кураш вазири Аммиҳай Шиклининг сўзларига кўра, энди шаҳарни “ХАМАСни қўллаб-қувватловчи шахс” бошқаради.

“Бир вақтлар умумий эркинлик рамзи бўлган шаҳар ҳокимият калитини 25 йил олдин Нью-Йоркнинг уч минг аҳолисини ўлдирган фанатикларнинг позициясидан унча фарқ қилмайдиган, ХАМАС тарафдори қўлига топширди”, — деб ёзди Шикли Х ижтимоий тармоғидаги саҳифасида.

Вазирнинг фикрича, Нью-Йорк энди ҳеч қачон аввалгидек бўлмайди, айниқса унинг яҳудий жамоаси учун.

“Шу боис яҳудийлар Исроил заминини янги уйларига айлантириш ҳақида жиддий ўйлаб кўришлари керак. Нью-Йорк ва Лондон жарликка очиқ кўз билан кириб бормоқда”, — деб қўшимча қилди Шикли.

Маълумот учун, Зоҳран Мамданий Исроил ҳукуматини “апартеид режими”, Ғазодаги уруши эса “геноцид” деб атаган. Бироқ у ХАМАС ҳақида ҳеч қандай баёнот бермаган.

• АҚШ
• Isroil
• Мурожаат
• Nyu-York
• Вазирлик
• saylov