Транспорт вазири ўринбосари Хитой корпорациясига Тошкент, Самарқанд ва Қўқон шаҳарларида жойлашган темир йўл вокзалларини давлат-хусусий шериклик асосида модернизация қилиш ва бошқариш лойиҳаси ҳамда транспорт соҳасидаги бошқа истиқболли лойиҳаларда иштирок этишни таклиф қилган.

Хитойнинг “Sino Road and Bridge Corporation” корпорацияси Ўзбекистонда транспорт инфратузилма лойиҳаларида иштирок этишга қизиқиш билдирмоқда. Бу ҳақда Транспорт вазирлиги матбуот хизмати хабар берди.  

2 апрель куни транспорт вазири ўринбосари Жасурбек Чориев ушбу корпорациянинг хорижий бўлими ижрочи бош директори Джимми Чанг бошчилигидаги делегация вакиллари билан учрашган.

Томонлар транспорт соҳасидаги инвестиция лойиҳаларини амалга оширишда Хитой компаниясининг иштирок этиш имкониятлари юзасидан фикр алмашган.

Жумладан, Джимми Чанг Sino Road and Bridge Corporation корпорацияси темирйўл, авиация ва йўл хўжалиги инфратузилмаларини ривожлантириш лойиҳаларида иштирок этишдан манфаатдорлигини билдирган.

Транспорт вазири ўринбосари Sino Road and Bridge Corporation корпорациясига Тошкент, Самарқанд ва Қўқон шаҳарларида жойлашган темир йўл вокзалларини давлат-хусусий шериклик асосида модернизация қилиш ва бошқариш лойиҳаси ҳамда транспорт соҳасидаги бошқа истиқболли лойиҳаларда иштирок этишни таклиф қилган.

Учрашув якунида транспорт вазири ўринбосари муҳокама этилган лойиҳалар юзасидан Sino Road and Bridge Corporation корпорациясига ҳар икки томон учун манфаатли бўлган аниқ таклифларни ишлаб чиқиш зарурлигини айтган.

• Transport vazirligi