Давлат байроғи қабул қилинган куннинг 32 йиллиги муносабати билан “Янги нафас” оммавий югуриш мусобақаси бўлиб ўтди. Ўзбекистоннинг 16 та шаҳрида бир вақтда ташкил этилган спорт тадбири соғлом турмуш тарзи тарафдорларини ўзида жамлади.

Мусобақа Тошкент шаҳрида, Нурафшон, Гулистон, Андижон, Наманган, Фарғона, Жиззах, Самарқанд, Навоий, Бухоро, Қоровулбозор, Термиз, Қарши, Ғузор, Хива ва Нукус шаҳарларида ташкил этилди.

Пойтахтда ўтган тантанали очилиш маросимида сўз олган расмийлар бу каби мусобақаларни ўтказиш анъана тусига кириб қолгани, бу орқали мамлакатимиз аҳолиси орасида соғлом турмуш тарзи тарғиботи янада кучайиб бораётгани ҳақида тўхталишди.

Пойтахтимизда ушбу спорт тадбири шаҳарнинг энг маркази – “Humo Arena” спорт мажмуасининг майдонида бўлиб ўтди, унда 8 мингга яқин иштирокчи 3 ва 10 км масофаларга югуриш бўйича беллашиш учун йиғилди. Бошқа шаҳарларда оммавий югуриш мусобақасиумумий 3 км масофада ташкил этилди.

Таъкидлаш жоизки, кенг кўламли спорт тадбирини ташкил этиш учун республика бўйлаб 450 дан ортиқ волонтёрлар жалб этилган. Ташкилотчилар томонидан ҳакамлар ва мураббийлар учун ўқув машғулотлари ўтказилди, Қарши, Наманган ва Нукус шаҳарларида матбуот анжуманлари ташкил этилди. Ёш авлод тарбияси “Янги Нафас” ҳаракатининг муҳим йўналишидир. Байрамда Олий таълим, фан ва инновациялар вазирлиги кўмагида Ўзбекистоннинг 211 та олий таълим муассасаларидан 50 мингдан ортиқ талаба фаол иштирок этди.

Тошкентда 3 км масофада ғолибликни аёллар орасида Анастасия Силченкова, эркаклар орасида Хасан Мирсоатов қўлга киритди. 10 км масофага югуришда эса – Марина Хмелевская ва Нодирбек Муталипов ғалабага эришди.

• Фарғона
• Марафон
• Тошкент
• Хива
• musobaqa