Гринвичдаги (АҚШ) Брюс музейи олимлари энг катта пингвиннинг тошга айланган қолдиқларини топишди: ҳайвоннинг оғирлиги 154 килограмм бўлган ва 50 миллион йил аввал Янги Зеландия яқинидаги сувларда яшаган. Топилманинг тадқиқот натижалари “Journal of Paleontology” илмий журналида чоп этилган.

“Янги Зеландиядаги яқинда топилган қазилма топилмалар пингвинлар жамоасида ҳайратланарли хилма-хилликни очиб берди. Энг катта намуна янги турдаги “Kumimanu fordycein” эканлиги аниқланди. Бу пингвин Ерда яшаган энг каттаси ҳисобланади”,– дейилади ҳисоботда.

Янги Зеландия пляжида бошқа пингвин турларининг қолдиқлари билан бирга “Kumimanu fordycein” номини олган янги турнинг деярли тўлиқ скелети ҳам топилган. Тадқиқотчилар томонидан ушбу улкан қуш вазни 154 килограммга баҳоланди. Бу уни ҳозирги кунгача маълум бўлган энг катта пингвинга айлантиради.

Қайд этилишича, аввалги энг катта пингвин “Palaeeudyptes klekowskii” ҳисобланган, у тахминан 37 миллион йил олдин Антарктидада яшаган ва оғирлиги 116 кгни ташкил этган.

Топилма муаллифларининг фикрича, “Kumimanu fordycein” исбатан ибтидоий қанот суякларига эга бўлган, улар уча олмаган, лекин ушбу турга мансуб пингвинлар замонавийларига қараганда кўпроқ учувчи қушларга ўхшаб кетар эди. Шунингдек, олимлар “K.fordycein”нинг улкан ҳажми гигантизмнинг энг қадимги пингвинларда ривожланганлигини кўрсатади, дея ҳисоблашади. Катта тана ҳажми, эҳтимол, қушларга ҳароратни самаралироқ ушлаб туришга ва яхшироқ шўнғишга ёрдам берган бўлиши мумкин.

• Ibtidoiy davr
• Янги Зеландия
• топилма