Беш карра “Олтин тўп” соҳиби, португалиялик футболчи Криштиану Роналду журналист Пирс Морган билан интервьюда АҚШ президенти Доналд Трампни ёқтиришини айтиб, ўзини ундан машҳурроқ инсон деб ҳисоблашини айтди.

Роналду Трампни “дунёдаги энг муҳим одамлардан бири” деб атаган ва у билан шахсан учрашишни исташини ҳам қўшимча қилган.

“Ким машҳурроқ — менми ёки Трамп? Шу мавзуда баҳс ташкил қилайлик. Мен Трампдан ҳам машҳурроқман, ҳаттоки энг кичик оролларда ҳам мени танишади. Менимча, дунёда мендан машҳурроқ одам йўқ. Лекин очиғи, мен ҳеч қачон бу қадар машҳур бўлишни истамаганман, фақат муваффақиятли инсон бўлишни хоҳлаганман”, – деган Криштиану.

Маълумот учун, 2024 йилда Криштиану Роналду ижтимоий тармоқларда 1 млрд обуначига эга бўлган илк инсонга айланганди. Шулардан 667 млн — Instagram’да, 77 млн — YouTube’да, 113 млн эса Х (собиқ Twitter) ижтимоий тармоғида.

Эслатиб ўтамиз, 2023 йилдан бери Саудия Арабистонининг “Ан-Насср” жамоаси шарафини ҳимоя қилиб келаётган Роналду, бунга қадар Португалиянинг “Спортинг”, Англиянинг “Манчестер Юнайтед”, Испаниянинг “Реал Мадрид” ва Италиянинг “Ювентус” каби жамоаларида фаолият олиб борган.

• Футбол
• Интервю
• Mashhurlik
• Роналду
• Трамп