Узоқ йиллар давомида Ер олам марказида деб ишониб келинган, ўтмишдаги инсонларнинг фикрига кўра, қуёш биз учун нур сочмоқда, юлдузлар биз учун чарақлаб турибди ва барча осмон жисмлари бизнинг атрофимизда айланмоқда. Аслида Ернинг коинотдаги ўрни қандай?

Юқоридаги расм 1990 йил 14 февралда, Воягер 1 фазо кемаси орқали Нептун орбитасидан туриб олинган, у ердаги қизил доирага олинган, кичик нуқта Ер сайёраси. Бу нуқтага яна бир қаранг. Бу бизнинг уй. Бу биз. Сиз севган, сиз билган, сиз ҳаётингиз давомида эшитган, Ер сайёрасида яшаб ўтган, яшаётган барча инсонлар шу нуқта ичида. Бизнинг хурсандчиликларимиз, азобларимиз ва моддий муаммоларимиз шу ерда. Ҳар бир қаҳрамон, ҳар бир қўрқоқ, цивилизациянинг ҳар бир яратувчиси ва бузғунчиси, ҳамма қироллар ва деҳқонлар, ҳамма севишган жуфтликлар, ҳамма ота-оналар, ҳар бир орзуларга тўла болакай, ҳамма ихтирочилар ва кашфиётчилар, ҳамма руҳоний ва уламалар мана ўша митти жанг заррасидек кўриниб турган нуқтада яшаб ўтишган.

Ер сайёраси улкан коинотдаги митти бир зарра. Тарихда дарёдек бўлиб оққан қонлар мана шу нуқтани бир қисми учун бўлганини ўйлаб кўринг. Мана ўша нуқтанинг бир қисмида яшовчи одамлар, нуқтанинг бошқа бир қисмидаги одамларга нисбатан қилган шафқатсизликларини ўйланг, улардаги тушунмовчилик қанчалик кўп, бир-бирларини ўлдиришга интилишлари қанчалик юқори, бир бирига бўлган нафрат қанчалик оташин.

Бизнинг оламдаги жойлашувимиз ўзига хос, коинотда қандайдир имтиёзли мавқега эгамиз деб ўйласак адашамиз, бу рангпар митти нуқта бизга эътироз билдириб турибди. Бизнинг сайёрамиз улкан космик зулматдаги ёлғиз доғдир. Бу қадар катта кенгликда бизни қутқариш учун ўзимиздан бошқа жойдан ёрдам келишига ишора йўқ.

• kosmos