“Агар бу украиналиклар учун тинчликка эришишимиз ва одамларни йўқотмаслигимиз мумкин бўлган ягона конфигурация бўлса, албатта, биз бунга борамиз”, – дейди Зеленский британиялик журналист Пирс Морганга берган интервьюсида. Бундан ташқари, у агар аҳолига тинчлик олиб келишнинг ягона схемаси Россия президенти Владимир Путин билан музокаралар столига ўтириш бўлса, бунга тайёрлигини ҳам айтган. Бу ҳақда “Украинская правда” хабар бермоқда.

Шунингдек, Зеленский бу вазиятда унинг Кремль раҳбарига шахсий муносабати аҳамиятга эга эмаслигини таъкидлаб, уни душман деб ҳисоблашини айтган.

Президент ҳозирги кунда Украина барча ҳудудларни қайтариб ололмаслигини ва “эришиш эҳтимоли бўлмаган натижа учун миллионлаб одамларни йўқотиши мумкин эмаслигини” таъкидлаган.

Зеленский “ватан учун жонини фидо қилганларга берган қасамёдини буза олмаслиги”ни айтган. Сиёсатчи Конституцияни бузиш ва босиб олинган ҳудудларни Россияга тегишли деб тан олиш мумкин эмаслигини қайд этган.

Бундан ташқари, Украина президенти жанговар ҳаракатлар давом этаётган пайтда мамлакатда сайловлар ўтказиш имкониятини яна бир бор инкор этди.

Эслатиб ўтамиз, мамлакатда навбатдаги президентлик сайлови 2024 йил 31 март куни ўтказилиши керак эди. Украинадаги ҳарбий ҳолат туфайли улар ўтказилмаган.

Украинанинг урушни тугатиш шартлари қуйидагилардан иборат:

Украина қўшинларни 1991 йил чегараларига олиб чиқишни назарда тутувчи “тинчлик формуласи”ни амалга оширишни талаб қилмоқда. Гап 2014 ва 2022 йилларда Россия томонидан у ерда ўтказилган “референдумлар” ва Украинанинг Қрим, Донетск, Луганск, Херсон ва Запороже вилоятлари ноқонуний аннексия қилингани ҳақида кетмоқда. Москва “тинчлик формуласи” асосида музокаралар олиб бориш имкониятини истисно қилади.

Россия шартлари эса қуйидагича:

Путин ўт очишни тўхтатиш учун ўз шартларини илгари сурди, жумладан, Украина қўшинлари ўзини ўзи мустақил деб эълон қилинган ДХР, ЛХР, Херсон ва Запороже вилоятларидан олиб чиқилиши, ушбу тўртта ҳудуд ва Қрим гўёки халқаро миқёсда Россиянинг бир қисми сифатида тан олиниши, Украинанинг НАТОга аъзоликдан воз кечиши ва санкцияларни олиб ташлаш.

Зеленский эса бу таклифларни “ишониб бўлмайдиган” ультиматум деб атайди.