Toshkent viloyatida gaz ta’minoti filiali kompleks nazorat tuzilmalari, tuman/shahar gaz ta’minoti bo‘limi va “O‘zenergoinspeksiya” xodimlari hamkorligida o‘tkazilgan nazorat tadbirlarida “zangori yoqilg‘i”dan foydalanishda qoidabuzarlik sodir etganlar aniqlandi.

Xususan, Toshkent tumanida joylashgan “I. S. S.” MCHJga qarashli mebel ishlab chiqarish korxonasining tabiiy gazdan foydalanish holati o‘rganilganda, iste’molchi ta’minot idorasi bilan shartnoma tuzmasdan, tabiiy gazdan noqonuniy foydalanib kelayotgani ma’lum bo‘ldi. Holat yuzasidan dalolatnoma tuzilib, dastlabki hisob-kitoblarga ko‘ra, 1 milliard 134 million so‘mlik zarar aniqlandi.

Yana bir noqonuniy holat tumanning “Chinor” MFYda joylashgan “D. D. A.” YTTga qarashli ovqatlanish maskanida fosh etildi. Binoda hisoblagichdan tashqari rezina shlang orqali tarmoqqa ulanib, tabiiy gazdan noqonuniy foydalanib kelinayotgani ma’lum bo‘ldi. Mazkur holat bo‘yicha 137 million so‘mlik zarar qayta hisob-kitob qilindi.

Yuqoridagi noqonuniy holatlarga oid barcha hujjatlar huquqni muhofaza qiluvchi organlarga topshirildi.

• Umumiy ovqatlanish
• Zararkunanda
• korxona
• korxona va tashkilotlar