Xalq taʼlimi vazirligi matbuot xizmati bir muddat oldin ijtimoiy tarmoqlarda tarqalgan o‘quvchining kaltaklanishi aks etgan video yuzasidan qo‘shimcha maʼlumot berdi.

Unga ko‘ra, Bandixon tumani 4-sonli maktabning ingliz tili fani o‘qituvchisi Yu.Sh ning 9-B-sinf o‘quvchisi X.I ni kaltaklangan videolavha yuzasidan viloyat xalq taʼlim boshqarmasining ishchi guruhi tomonidan o‘rganish ishlari olib borilgan.

O‘rganishlar natijasida aniqlanishicha, mazkur holat 2022-yil 27-aprel kuni sodir bo‘lgan. O‘qituvchi Yu.Sh o‘sha kuni dars jadvali asosida 9-B-sinf o‘quvchilariga dars mashg‘ulotlarini o‘tgan. Dars mashg‘uloti davomida 9-B-sinf rahbari E.J sinfxonaga kirib kelib, 9-B-sinf o‘quvchilarining o‘zaro janjalini ijtimoiy tarmoqqa kim tarqatganligini muhokama qilgan. Ushbu sinf o‘quvchisi X.I sinf rahbari E.J va Ingliz tili fani o‘qituvchisi Yu.Sh ga gap qaytargani uchun Yu.Sh jahl ustida X.I ni kaltaklagan. Ushbu holat 9-B-sinf o‘quvchilari tomonidan videotasvirga olingan va 15 may kuni ijtimoiy tarmoqlarga tarqatilgan.

Ushbu masala bo‘yicha tuman hokimligi, tuman prokuraturasi, ichki ishlar bo‘limi va tuman xalq taʼlim bo‘limi masʼul xodimlari tomonidan maktabda o‘rganish o‘tkazilib, pedagog jamoa aʼzolari va o‘qituvchilar bilan taʼlim-tarbiya jarayoni bo‘yicha suhbat o‘tkazildi hamda 2022-yil 27-aprel kuni sodir bo‘lgan voqeaga aniqlik kiritildi.

Shuningdek, surishtiruvlarda 9-B sinfdagi ayrim o‘quvchilarning maktabda o‘rnatilgan tartib-qoidalarni muntazam buzib keluvchilar ekanligi aniqlangan.

Aynan ushbu o‘quvchilarning ota-onalariga farzandlarining xulqi va darsga tayyorlanmasdan kelishi yuzasidan alohida ko‘rsatmalar hamda tavsiyalar berib borilgan.

Vazirlik shuningdek, ushbu voqea ortidan 4 nafar xodimning ishdan olingani hamda mazkur maktabning 19 yillik direktoridan ham ishdan bo‘shash haqidagi arizasi olinganini maʼlum qildi.

“Vaziyatni yetarli ravishda nazorat qilmaganligi uchun Bandixon tumani 4-maktab direktori X.B dan mehnat shartnomasini bekor qilish to‘g‘risida boshqarma boshlig‘i nomiga arizasi olindi.
Maktabning maʼnaviy-maʼrifiy ishlar bo‘yicha direktor o‘rinbosari O.S, o‘quv ishlar bo‘yicha direktor o‘rinbosari N.A va Ingliz tili fani o‘qituvchisi Yu.Sh va 9-B-sinf rahbari E.J bilan tuzilgan mehnat shartnomasi belgilangan tartibda bekor qilindi”, – deyiladi xabarda.

Yuqoridagi holatni boshqa taʼlim muassasalarida takrorlanmasligi yuzasidan Bandixon tuman xalq taʼlimi bo‘limi rahbariyatiga tegishli ko‘rsatmalar berildi.

Hozirda ushbu holat yuzasidan tuman ichki ishlar bo‘limi xodimlari tomonidan tergovga qadar surushtiruv ishlari olib borilmoqda.

• Munosabat
• Surxondaryo
• XTV