Dohada oʻtkazilayotgan 36-jahon chempionatining birinchi kuni terma jamoamiz uchun omadli keldi.

-60 kg vazn toifasida Oʻzbekiston sharafini himoya qilgan Dilshodbek Baratov finalga qadar magʻlubiyatsiz yetib kelib, faoliyatida ilk bor jahon chempionatining kumush medali hamda qimmatli 1 400 reyting ochkosiga ega boʻldi.

U hal qiluvchi final bellashuvida ispaniyalik Fransisko Garrigosga imkoniyatni boy berib qoʻydi. Garrigos 1/2 finalda yaponiyalik Olimpiada chempioni Takatoni chiroyli usul bilan magʻlub etgan edi.

Baratov dastlab moʻgʻulistonlik Ariunbold Enxtayvindan Toshkentdagi jahon chempionati yarim finali, undan soʻng jahon chempioni, ikki karra Olimpiada sovrindori qozogʻistonlik Yeldos Smetovdan bronza medali uchun bahsdagi magʻlubiyatlar uchun revansh oldi. 1/4 finalda marokashlik Yones Saddiki, 1/2 finalda belgiyalik Yorre Verstraytendan ustun kelgan edi.

Oʻz navbatida, bugun dunyoning 100 ga yaqin davlati dzyudochilari ishtirokida oʻtayotgan yilning eng nufuzli musobaqasida ikkinchi kungi bellashuvlar tashkil etiladi.

Oʻzbekistonlik quyidagi dzyudochilar -52 va -66 kg vazn toifalarida medallar hamda reyting ochkolari uchun tatamiga chiqadilar:

-52 kg: Diyora Keldiyorova – Estrella Lopez Sheriff /Selin Baba

-52 kg: Sita Kadambayeva – Gabriela Domitrova

-66 kg: Muhriddin Tilovov – Veyl Ezzine

-66 kg: Sardor Nurillayev – Abrek Naguchev.

• Dzyudo
• Jahon chempionati
• O‘zbekiston