Bugun, 13-iyun kuni Shavkat Mirziyoyev huzurida standartlashtirish va sertifikatlashtirish sohalariga bag‘ishlangan yig‘ilish bo‘lib o‘tdi.

Xususan, O‘simliklar karantini va himoyasi agentligiga Qishloq xo‘jaligi vazirligi va viloyat hokimlari bilan birga meva-sabzavot yetishtirilayotgan 200 ming gektar maydonni xalqaro talablarga moslashtirish, shuningdek, yil yakunigacha 249 ta meva-sabzavot klasterlari bilan ishlab, xalqaro bozorlarga eksport qiladigan korxonalar sonini 400 tagacha oshirish topshirildi.

Qayd etilishicha, yil yakunigacha 13 ta hududiy agrokimyo laboratoriyani jihozlashga 10 million dollar yo‘naltiriladi.

Yig‘ilishda Veterinariya qo‘mitasiga viloyat hokimlari bilan birga yil yakuniga qadar chorvachilik mahsulotlarini eksport qiluvchilar sonini 1,5 baravarga oshirib, 700 taga yetkazish topshirilgan.

Bundan tashqari, Sanitariya-epidemiologik osoyishtalik xizmatiga viloyat markazlaridagi 14 ta laboratoriyani xalqaro akkreditatsiyadan o‘tkazish vazifasi qo‘yilgan.

Bojxona qo‘mitasiga 1-oktyabrgacha eksport, import va tranzit bo‘yicha barcha sertifikat va ruxsatnomalarni “Yagona darcha” orqali yuritishni yo‘lga qo‘yish topshirildi.

Yig‘ilish yakunida mutasaddilarning hisoboti eshitilgan.

• Eksport
• Import
• Meva
• Shavkat Mirziyoyev
• agrokimyo