Rossiya Davlat Dumasining Jismoniy tarbiya va sport qo‘mitasi raisi Dmitriy Svichyov rossiyalik 15 yoshli figurali uchuvchi Kamila Valiyevaga davlat mukofoti taqdim etilishini ma’lum qildi. 

Qayd etilishicha, kecha, 17-fevral kuni Valiyeva Pekinda (Xitoy) 2022-yilgi Olimpiada o‘yinlarining shaxsiy turnirida to‘rtinchi o‘rinni egalladi. Jamoaviy turnirda esa Rossiya terma jamoasi safida oltin medalni qo‘lga kiritdi.

“Valiyevaga davlat mukofoti taqdim etiladi. Bugun biz buni sport vaziri bilan muhokama qildik. Hozircha qanday mukofot ekani ma’lum emas – bularning barchasi prezident ma’muriyatida hal qilinadi. Kamilla aeroportda Olimpiya chempioni sifatida to'liq sharaf bilan kutib olinadi, chunki u yagona. Uning qiladigan ishlari juda ko‘p bor va uning butun hayoti oldinda”, – deydi Svichyov. 

Eslatib o‘tish mumkin, Kamila Valiyeva Pekin Olimpiadasining figurali uchish jamoaviy bahslarida oltin medalni qo‘lga kiritdi, biroq uning Yevropa chempionatida topshirgan doping testi musbat natija bergan va uning chempionligi bekor qilinishi mumkin.  

Shuningdek, yakkalik bahslarining erkin dasturida esa amaldagi Yevropa chempioni hisoblangan Valiyeva ikki marta qo‘pol xatoga yo‘l qo‘ydi va 4-o‘rin bilan kifoyalandi.
 

• Qishki Olimpiada
• Rossiya