Ma’lum qilinishicha, O‘zbekiston hududida terroristik jinoyatlarni sodir etgani uchun 23 yildan buyon qidiruvda bo‘lgan U.S. xorijda ushlanib, olib kelindi. Toshkent viloyatida tug‘ilgan 55 yoshli erkak 1998-yilda Chechenistonda jangovar tayyorgarlikdan o‘tib, 1999-yilning 16-fevral kuni Toshkent shahrida amalga oshirilgan qo‘poruvchilik harakatlarida ishtirok etgan va mart oyida aylanma yo‘llar orqali xorijga chiqib ketgan.

Ta’kidlanishicha,  u iordaniyalik Amir Xattob tomonidan Chechenistonda tashkil etilgan jangarilarni tayyorlash lagerlariga “Turkiston islom harakati” xalqaro terroristik tashkilotining O‘zbekistondan bo‘lgan a’zolarini jo‘natish bilan ham shug‘ullangan.

Qayd etilishicha, erkak 2001-yilning noyabr oyida boshqa shaxsning nomiga rasmiylashtirilgan soxta hujjatlar asosida MDHga a’zo davlatlardan birining fuqaroligini olib, o‘sha mamlakat hududida yashirinib yurgan. Davlat xavfsizlik xizmatining chet el maxsus xizmatlari bilan hamkorlikda olib borgan tezkor-qidiruv tadbirlari davomida U.S. hibsga olingan. Hozirda unga nisbatan qo‘zg‘atilgan jinoyat ishi doirasida tergov harakatlari olib borilmoqda.

• Jinoyat