2021-yil 18-noyabr kuni Andijon viloyati Shahrixon tumanida yashovchi 1991-yilda tug‘ilgan B. R. mazkur hududda joylashgan qabristonda o‘zini osib joniga qasd qilgan.

Bosh prokuratura Matbuot kotibi Xayot Shamsutdinovning Xabardor.uz’ga ma’lum qilishicha, voqea joyida tuman prokuraturasi hamda tuman IIB tergov-tezkor guruhi chiqib, voqea joyi ko‘zdan kechirilgan.

Olib borilgan tezkor surishtiruv harakatlari davomida B.R. Farg‘ona Davlat universitetida o‘qituvchi lavozimida ishlab kelganligi, “1xbet” bukmekerlik kompaniyasi orqali qimor o‘yinlari o‘ynab kelganligi, 16-noyabr kuni Farg‘ona shahrida yashovchi “Hurshidbek” ismli shaxsdan mazkur qimor o‘yinlarini o‘ynash uchun 57 mln so‘m miqdoridagi pullarni qarzga olganligi va “1xbet” o‘yinlarida mazkur pullarni yutkazib qo‘yganligi, mazkur pullarni 18-noyabr kuni qaytarib berishni va’da qilib, uyidan olib kelib berishini aytganligi aniqlangan.

Shuningdek, u oila a’zolariga o‘sha kuni telefon raqami orqali uni qabristondan topishlari to‘g‘risida sms-xabarnoma yuborgan. Oila a’zolari uni shu kuni soat 17:30 lar atrofida o‘zi istiqomat qilib kelgan MFY qabristonidan osilgan holatda topishgan.

Mazkur holat yuzasidan B.R. ning o‘limi sabablarini aniqlash bo‘yicha sud-tibbiy ekspertizasi tayinlandi.

Shuningdek, ish uchun ahamiyatli bo‘lgan holatlarni aniqlash bo‘yicha tuman IIBga alohida topshiriq yuborilgan.

Mazkur holat yuzasidan tuman prokuraturasi tergovchisi O.K.Valijonov tomonidan tergovga qadar tekshiruv harakatlari olib borilmoqda.

• Andijon
• Bosh prokuratura
• Farg‘ona
• Jinoyat