Oliy Majlis Qonunchilik palatasi deputati Zuhra Shodiyeva parlament quyi palatasida ko‘rilgan “O‘zbekiston Respublikasining Jinoyat kodeksiga korrupsiyaga oid jinoyatlar uchun javobgarlik muqarrarligini ta’minlashga qaratilgan o‘zgartish va qo‘shimchalar kiritish to‘g‘risida”gi qonun loyihasi xususida to‘xtalib, shu kunga qadar turli lavozimlarda o‘tirgan mansabdorlarning jinoyatlari oqibatida davlat va jamiyat manfaatiga qancha miqdorda zarar yetgani haqidagi statistikani keltiradi. 

Unga ko‘ra, mansabdor shaxslarning jinoyatlari oqibatida davlat va jamiyat manfaatlariga:
–  2018-yilda 556 mlrd. 
–  2019-yilda 1,858 trln. 
–  2020-yilda 500,1 mlrd. 
–  2021-yilning 9 oyida 658 mlrd. so‘m moddiy zarar yetkazilgan. 

Deputatning qayd etishicha, yuqoridagi qonun loyihasi bilan Jinoyat kodeksining sakkizinchi bo‘limi “korrupsiyaga oid jinoyatlar” degan yangi atama bilan to‘ldirilib, 15 turdagi jinoyat tarkiblari korrupsiyaga oid jinoyatlarga kiritilmoqda.

Mazkur qonun loyihasi bilan mansabdor shahslarga nisbatan choralar kuchaytiriladi. Ya’ni “Hokimiyat yoki mansab vakolatini suiiste’mol qilish”, “Hokimiyat yoki mansab vakolati doirasidan chetga chiqish”, “Hokimiyat harakatsizligi”, “Mansab soxtakorligi” va “Hokimiyatni suiiste’mol qilish, hokimiyat vakolatidan tashqariga chiqish yoki hokimiyat harakatsizligi” jinoyatlar agar “g‘arazgo‘ylik” niyatida sodir etilsa, korrupsiyaviy jinoyat hisoblanishi belgilanib, mazkur harakatlar uchun og‘irroq jazolar belgilanmoqda.
 

• Jinoyat
• Korrupsiya