Hindistonning Chennay shahrida boʻlib oʻtgan 44-Butunjahon shaxmat olimpiadasida shaxmatchilarimiz tarixiy gʻalaba bilan qaytishdi.

Oʻzbekiston erkaklar terma jamoasi umuman magʻlubiyatga uchramagan yagona jamoa boʻldi. Ayollar terma jamoasi ham 162 ta jamoa orasida musobaqani 31-oʻrinda yakunlashdi.

Prezident Shavkat MIrziyoyev chempion shaxmatchilarimizni gʻalaba bilan muborakbod etgan holda avtomobil va pul mukofoti bilan taqdirladi.

Shu munosabat bilan bugun Oʻzbekiston Respublikasi Sportni rivojlantirish vazirligida Butunjahon shaxmat olimpiadasi gʻoliblariga tantanali ravishda pul mukofotini topshirish marosimi boʻlib oʻtdi.

Tadbirda Sportni rivojlantirish vazirining oʻrinbosari M.Ismoilov, Oʻzbekiston Yoshlar ishlari agentligi raisi, mamlakat shaxmat federatsiyasi raisi A.Saʼdullayev, federatsiya raisining birinchi oʻrinbosari X.Turdaliyev, shuningdek, 44-Butunjahon shaxmat olimpiadasi gʻoliblari N.Yoqubboyev, N.Abdusattorov, J.Sindarov, Sh.Vohidov va J.Vohidov hamda ularning ota-onalari ishtirok etdi.

Tadbir yakunida shaxmatchilarga pul mukofotlari topshirildi.

Qayd etish mumkin, 2026-yilgi 46-Butunjahon shaxmat olimpiadasiga Oʻzbekiston mezbonlik qiladi.

• O‘zbekiston
• Shaxmat
• pul