AQSh hukumati Texas shtatida yuk mashinasidan topilgan 53 muhojirning o‘limi bo‘yicha to‘rt kishini gumonlanuvchi sifatida qo‘lga oldi. Ularga o‘lim jazosi tayinlanishi mumkin.

Ma‘lum bo‘lishicha, Federal hukumat kecha, 29-iyun kuni San-Antonioda treylerdan topilgan 53 muhojirning o‘limida gumonlanuvchilarni qo‘lga olgan. Ular to’rt kishi bo‘lib, yuk mashinasi haydovchisi 45 yoshli Homero Zamorano ham hozirda hibsda. Agar u haqiqatdan ham aybdor deb topilsa o‘lim yoki umrbod qamoq jazosiga tortilishi mumkin.

Gumonlanuvchilarga odam kontrabandasi ayblovi qo‘yilgan. Rasmiylarning ta’kidlashicha, haydovchi Braunsvilldan bo‘lgan, ammo keyinchalik Xyuston chekkasidagi Pasadena shahrida yashagan.

Texasning G‘arbiy okrugi bo‘yicha advokatining so‘zlariga ko‘ra, Zamorano o‘z boshqaruvida bo‘lgan avtomobilni 35-shtatlararo shosse yaqinida tashlab qochishga uringan. Ammo, xavfsizlik xizmati xodimlari uni qo‘lga olishgan.

Qayd etilishicha, hozirda tergov harakatlari davom etmoqda.

• AQSh
• Qurbon
• Yuk_avtomobil
• issiq