Ayni kunlarda Afg‘oniston Sanoat va savdo vaziri Nuriddin Aziziy boshchiligidagi delegatsiya mamlakatimizda bo‘lib turibdi. Delegatsiyaning mamlakatimizga tashrifi 6-iyulga qadar davom etadi. Delegatsiya tarkibidan 300 nafarga yaqin afg‘onistonlik tadbirkorlar va ishbilarmonlar o‘rin olgan.

Shuningdek, bugun, 3-iyul kuni Vazirlar Mahkamasida O‘zbekiston Respublikasi Bosh vaziri Abdulla Aripov Afg‘oniston delegatsiyasi bilan uchrashuv o‘tkazdi.

Ushbu uchrashuvda davlatlarimiz va xalqlarimiz o‘rtasidagi aloqalar do‘stlik, hamkorlik va yaxshi qo‘shnichilik tamoyillariga asoslanib, rivojlanib borayotgani alohida ta’kidlandi.

Tomonlar iqtisodiy, investitsiyaviy, energetika, transport-logistika, tog‘-kon sanoati, qishloq xo‘jaligi va boshqa sohalarda o‘zaro manfaatli hamkorlikning istiqbolli yo‘nalishlarini muhokama qilishdi. Bundan tashqari, o‘zaro savdo hajmini oshirish bo‘yicha aniq choralar belgilandi.

Ushbu tashrif doirasida bir qator vazirlik va idoralar bilan uchrashuvlar, ikki tomonlama biznes-forum hamda Afg‘oniston mahsulotlari ko‘rgazmasi o‘tkazilishi rejalashtirilgan.

Shu bilan birga, mehmonlar Toshkent va Samarqand shaharlaridagi qator ishlab chiqarish korxonalariga tashrif buyuradi hamda xalqimizning boy madaniy-tarixiy merosi bilan tanishadi.

• Afg‘oniston
• Delegatsiya