Afsonaviy tennischi Mariya Sharapova Rossiyaning Ukrainadagi harbiy harakatlari yuzasidan oʻz fikrlarini bildirib oʻtdi. Rossiyaning Tyumen shahrida dunyoga kelgan sportchi koʻp yillardan beri xorijda istiqomat qilishiga qaramay, oʻz obunachilaridan harbiy toʻqnashuvlardan jabr koʻrgan oilalarga yordam koʻrsatishni soʻragan.

“Yuragim kundan kunga tilka pora boʻlib bormoqda, Ukrainadagi inqirozdan aziyat chekkan oilalar, bolalarning suratlarini koʻrish, ularning hikoyalarini oʻqish juda ogʻir. Men yordamga muhtoj boʻlgan oilalarni oziq-ovqat, suv va tibbiy vositalar bilan taʼminlash uchun tinmay mehnat qilayotgan “Save the Children” tashkilotiga xayriya qildim. Iltimos, siz ham menga qoʻshiling. Men tinchlik uchun duodaman va ushbu holatga duch kelgan barcha-barchaga oʻz sevgim hamda koʻmagimni yoʻllab qolaman”, deb yozdi Sharapova oʻzining Instagram sahifasida.

Bundan bir muddat avval Gollivudning mashhur juftligi – Eshton Katcher va Mila Kunis ham ukrainaliklarni qoʻllab-quvvatlash uchun xayriya kampaniyasini boshlaganlari haqida maʼlum qilgan edilar. Supermodel Irina Sheyk esa shaxsiy hisobidan Ukraina Qizil Xoch jamiyati va BMTning qochqinlarga yordam koʻrsatuvchi tizimlariga xayriya qilgan.

• Sport
• mashhurlar