Fransiyaning PSJ klubi UEFA Chempionlar Ligasi finalida erishgan yirik g‘alabasi evaziga 25 mln yevro mukofot puli qo‘lga kiritdi. Parijliklar turnirdagi umumiy ishtiroki uchun esa jami 146 mln yevro daromad oldi. Turnir davomida klublar o‘z natijalariga qarab UEFA tomonidan belgilangan mukofot pullarini qo‘lga kiritishdi. Mukofotlar quyidagicha taqsimlangan:

- guruh bosqichidagi har bir g‘alaba uchun — 2,1 million yevro;

- har bir durang uchun — 700 ming yevro;

- 1/8 finalga chiqish — 12,5 million yevro;

- chorak final — 15 million yevro;

- yarim final — 18,5 million yevro;

- finaldagi g‘alaba — 25 million yevro;

Bundan tashqari, klublar UEFA tomonidan ajratiladigan marketing daromadlari va translyatsiya huquqlaridan ham foyda ko‘radi. Finalda parijliklarga 5:0 hisobida mag‘lub bo‘lgan “Inter” esa turnirdagi ishtiroki uchun jami 136,6 mln yevro ishlab topdi. Ushbu summaga finalga chiqqani uchun olingan 15 mln yevro va oldingi bosqichlardagi barcha mukofot pullari kiradi. “Arsenal” YeChL ortidan eng ko‘p daromad qilgan 3-jamoaga aylandi. Londonliklar turnirdagi ishtiroki evaziga 117 mln yevro qo‘lga kiritgan. Shuningdek, PSJ UEFA Superkubogi doirasida Londonda bo‘lib o‘tadigan bahsda ishtirok etadi va bu o‘yin uchun yana 4 million yevro mukofot puli ishlab oladi.

Ma’lumot uchun, Chempionlar Ligasi finali kecha, 31-may kuni Myunxen shahridagi “Allianz Arena” stadionida bo‘lib o‘tdi. Unda PSJ “Inter”ni 5:0 hisobida mag‘lub etdi. Bu Parij klubi tarixidagi ilk Chempionlar Ligasi kubogi hisoblanadi.

• Inter
• PSJ
• YeChL
• chempionat