Avval xabar qilinganidek, bugun Shavkat Mirziyoyev raisligida aholini uy-joy bilan taʼminlash dasturi ijrosini samarali tashkil etish, ipoteka kreditlashni kengaytirish va qurilish materiallari sanoatini yanada rivojlantirish chora-tadbirlari yuzasidan videoselektor yigʻilishi boʻlib oʻtdi.

Unda qayd etilishicha, aholi mablagʻlarini qurilishga jalb qilishni ragʻbatlantirish boʻyicha yangi “maqsadli ipoteka omonati” mexanizmi joriy etiladi. Bunda:

- xaridor – bank – quruvchi oʻrtasida uch tomonlama shartnoma tuziladi;

- uy-joy xarid qilmoqchi boʻlgan fuqaro bankda omonat ochib, uni toʻldirib boradi;

- badal summasi shakllanganda, unga ipoteka krediti rasmiylashtiriladi;

- tijorat banki omonat mablagʻlarini quruvchi tashkilotga kredit sifatida ajratadi.

Yaʼni, xaridor bank orqali quruvchini moliyalashtiradi, bank esa uyni xaridorga vaqtida topshirilishiga kafil boʻladi.

Shu bilan bir qatorda, reytingda yuqori oʻrinlarda boʻlgan pudratchi tashkilotlarga uy-joy qurish uchun yerni auksiondan sotib olish toʻlovini avval 30 foizini, qolgan summani esa 12 oy davomida boʻlib-boʻlib toʻlashga ruxsat beriladi.

Shuningdek, Prezident kelgusi yilda ipoteka dasturlari doirasida 50 mingga yaqin xonadonli uy-joylar qurilishini va bunga qariyb 13 trillion soʻm maqsadli kredit hamda 1,3 trillion soʻm subsidiya ajratilishini aytib oʻtgan.

• Mirziyoyev
• Prezident
• Videoselektor